İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 321 Hüküm no: 305 Orijinal metin no: [77b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muslu Bey b. İbrahim’den satın aldığı at bedeli borcunu ödemesi hususunda Safer v. Yagi’ye tembihte bulunulduğu Havâss-ı Refî‘a müzâfâtından hadîka-i Davudpaşa bostancılarından bâ‘is-i hâze’l-kitâb Muslu Bey b. İbrahim nâm kimesne meclis-i şer‘-i şerîfde Safer v. Yagi? nâm zimmî muvâcehesinde üzerine da‘vâ ve takrîr-i kelâm edip bundan akdem mezbûrdan semeni yüz seksen gün tamâmına değin müeccel ve mev‘ûd olmak üzre bir re’s doru bârgirimi on bir esedî guruşa bey‘ ve teslîm ol dahi ber vech-i muharrer iştirâ ve tesellüm ve kabz etmeğin hâlâ ecel-i mezbûr hulûl etmekle mezbûr Safer’e suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda hadîka-i mezbûre bostancılarından Hüseyin Bey b. Şaban ve Mustafa Bey b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr bundan akdem mezbûr Mehmed’e semeni seksen gün tamâmına değin müeccel ve mev‘ûd olmak üzre bir re’s doru bârgirini on esedî guruşa bizim huzûrumuzda bey‘ ve teslîm mezbûr Safer dahi ber vech-i muharrer iştirâ ve tesellüm ve kabûletmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr meblağ-ı mezbûr on bir esedî guruşu edâ ve teslîme merkūm Safer’e tenbîh olunmağın mâ vaka‘a bi’t-taleb ketb olundu. Fi’l-yevmi’t-tâsi‘ ve ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Ebûbekir b. Hüseyin, Mustafa el-Muhzır, İbrahim Çelebi b. Mehmed, İsmail Çelebi el-Muhzır, İbrahim Çelebi b. Ahmed ve gayruhüm.