İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 321 Hüküm no: 306 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mehmed’in kefaletten dolayı Sultan bt. Mehmed’de olan alacağının tahsili Mahmiye-i İstanbul’da Emin Bey mahallesi sâkinlerinden bâ‘is-i hâze’l-kitâb Ahmed Çelebi b. Mehmed nâm kimesne meclis-i şer‘-i şerîfde Sultan bt. Mehmed nâm hâtun mahzarında üzerine da‘vâ ve takrîr-i kelâm edip târih-i kitâbdan altmış gün mukaddem gāib ani’l-meclis Kahraman nâm hâtunda beynimizde ma‘lûm eşyâ semeninden otuz guruş hakkım olup meblağ-ı mezbûrun on altı guruşu için işbu hâzır bi’l-meclis Sâliha bt. Yusuf nâm hâtun üzerine havâle-i sahîha-i şer‘iyye ile havâle edip ben dahi mezbûr Sâliha ile havâle-i mezbûru kabûl ettiğimizden sonra mezbûr[e] Sultan meblağ-ı mezbûr on [78a] altı guruşu tarafından emir ve kabûlü hâviye kefâlet-i sahîha-i şer‘iyye ile kefîl olduğundan sonra ben dahi meblağ-ı mezbûru altmış bir gün tamâmına değin te’cîletmiş idi[m] hâlâ ecel-i mezbûr hulûl etmekle mezbûr Sultan’a suâl olunup meblağ-ı mezbûru kefâletine binâen bana teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahrûse-i Galata mahallâtından Câmi‘-i Kebîr mahallesi sâkinlerinden Mustafa b. Abdullah ve Mahmud b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan altmış gün mukaddem mezbûr Kahraman merkūme Sâliha üzerine havâle eylediği meblağ-ı mezbûr on altı guruşu tarafından emir ve kabûlü hâviye kefâlet ile kefîl olmuş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde gıbbe’r-ri‘âyeti şerâiti’l-kabûl şehâdetleri makbûle olunmağın mûcebince meblağ-ı mezbûru mezbûr on altı guruşu müdde‘î-i mezbûre edâ ve teslîme kefâlete binâen mezbûre Sultan’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâlis min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Mustafa b. Tevekkül, İbrahim Çelebi b. Ahmed, İsmail Çelebi b. Ahmed, Mustafa b. Muharrem ve gayruhüm.