İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 324 Hüküm no: 308 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden bakkal Yani v. Yorgi’nin küçük oğlu Yorgi’ye annesi Astamo’nun vasî tayin edildiği Mahmiye-i İstanbul’da Zindan kapısı dâhilinde bakkal iken hâlik olan Yani v. Yorgi nâm zimmînin sulbî sagīr oğlu Y[o]rgi’nin emvâlini hıfz ve ahvâlini zabta taraf-ı şer‘den bir vasî nasb ve ta‘yîn olunmak ehem ve elzem ve hâlik-i mezbûrun vâlidesi olan Astimo bt. Andriye nâm nasrâniyye müstakīme ve her vechile vesâyet uhdesinden gelmeğe kādire olmağın sagīr-i mezbûrun emvâlini hıfz ve ahvâlini zabta taraf-ı şer‘-i şerîfden mezbûre Astimo vasî nasb ve ta‘yîn olundukda mezbûre Astimo dahi vesâyet-i mezbûreyi kabûl ve hizmet-i lâzımesini edâya [mü]te‘ahhid olmağın mâ hüve’l-vâki‘ bi’t-taleb ketb olundu. Fî selh-i Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman b. Ömer, Hüseyin b. Ebûbekir, Mehmed b. Mehmed ve gayruhüm mine’l-hâzırîn.