İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 330 Hüküm no: 314 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülizar bt. Abdullah ve Mehmed b. Ahmed’in Veli Efendi b. Mehmed aleyhindeki tereke davasında haksız oldukları Mahmiye-i İstanbul’da Dülgerzâde mahallesinde sâkin iken bundan akdem vefât eden Mahmud b. el-Hâc İbrahim nâm kimesnenin verâseti, zevce-i metrûkesi Gülizar bt. Abdullah nâm hâ[tu]n ile li üm karındaşları Mustafa ve Fâtıma ve Emetullah ve li ebeveyn ammî oğlunun oğulları Mehmed ve Mustafa ibney Ahmed nâm kimesnelere münhasıra olduğu şer‘an mütehakkik oldukdan sonra mezbûr Mehmed ve zât-ı ma‘rifet-i şer‘iyye ile ârifân Musa Efendi b. Mustafa ve İbrahim Çelebi b. Ahmed nâm kimesnelerin ta‘rîfleriyle mu‘arrefe olan Gülizar Hâtun meclis-i şer‘de, bâ‘is-i hâze’l-kitâb Veli Efendi b. Mehmed nâm kimesne mahzarında her biri üzerine takrîr-i da‘vâ ve tasdîr-i müdde‘â edip mezbûr Veli Efendi’nin li ebeveyn karındaşı olup bundan akdem vefât eden el-Hâc Hüseyin Efendi nâm kimesne hayâtında mûrisimiz müteveffâ-yı mezbûrun vasiyy-i muhtârı olmağla terekesine vâzı‘ü’l-yed olduğu hâlde vefât ettiğinden sonra mezbûr Veli Efendi mûrisimiz müteveffâ-yı mezbûrun terekesine vâzı‘ü’l-yed olan müteveffâ-yı merkūm el-Hâc Hüseyin Efendi’nin evlâd-ı sıgārına kıbel-i şer‘den mansûb vasîsi olmağla terekesine vâzı‘ü’l-yed olmağın hâlâ suâl olunup mûrisimiz müteveffâ-yı mezbûrun terekesinden bi’l-irsi’ş-şer‘î bize isâbet eden hisse-i şer‘iyyemizin müteveffâ-yı merkūm el-Hâc Hüseyin Efendi’nin ber vech-i muharrer terekesine vâzı‘ü’l-yed olan mezbûr Veli Efendi’den alıverilmesi matlûbumuzdur dediklerinde gıbbe’s-suâl mezbûr Veli Efendi cevâbında kaziyye minvâl-i muharrer üzre olduğunu ikrâr, lâkin karındaşı müteveffâ-yı mezbûr el-Hâc Hüseyin Efendi’nin ber vech-i muharrer terekesine vâzı‘ü’l-yed olduğunu münkir olmağın müdde‘iyân-ı mezbûrândan müdde‘âlarını mübeyyine beyyine taleb olundukda ityân-ı beyyineden her biri izhâr-ı acz edip istihlâf etmeleriyle fi’l-hakīka müteveffâ-yı mezbûr el-Hâc Hüseyin Efendi’nin minvâl-i muharrer üzre terekesine vâzı‘ü’l-yed olmadığına merkūm Veli Efendi’ye yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘iyân-ı mezbûrân bilâ-beyân vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Hasan b. Oruc, Molla Mehmed b. Mustafa, İbrahim b. Yusuf, Mehmed De[de] b. Celal?