İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 329 Hüküm no: 313 Orijinal metin no: [81a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. es-Seyyid Ali Çelebi b. Mustafa’nın Mehmed Çelebi b. Abdullah’a olan borcunu ödemeyi taahhüt ettiği Medîne-i Edirne’de Yeşilminâre mahallesi sâkinlerinden olup misâfiren mahmiye-i İstanbul’da Çelebioğlu mahallesinde sâkin Mehmed Çelebi b. Abdullah nâm kimesne meclis-i şer‘-i şerîfde bâ‘is-i hâze’l-kitâb es-Seyyid Ali Çelebi b. Mustafa nâm kimesne mahzarında ikrâr ve takrîr-i kelâm edip gāib ani’l-meclis Ahmed Çelebi nâm kimesne ile yedimizde müşterek olan malımızdan bundan akdem Musa Bey nâm kimesneye ikrâz ve teslîm ol dahi iktirâz ve tesellüm eylediği bin dört yüz guruşa mezbûr es-Seyyid Ali Çelebi ile gāib ani’l-meclis Süleyman b. Ramazan nâm kimesne tarafından emir ve kabûlü hâviye kefâlet ile kefîl olduklarından sonra meblağ-ı mezbûr bin dört yüz guruşdan mezbûr es-Seyyid Ali Çelebi’nin zimmetine lâzım gelen yedi yüz guruşun iki yüz guruşunu mezbûr es-Seyyid Ali Çelebi bana edâ ve teslîm ben dahi ahz u kabz edip beş yüz guruşu bâkī kalmış idi hâlâ meblağ-ı bâkī-i mezbûru merkūm es-Seyyid Ali Çelebi târih-i kitâbdan yirmi gün tamâmına değin bana edâ ve teslîme ta‘ahhüd eyledi dedikde mezbûr es-Seyyid Ali Çelebi mukırr-ı mezbûr Mehmed Çelebi’yi cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Mustafa Çelebi b. ( ), es-Seyyid Mehmed Çelebi b. ( ), es-Seyyid Muharrem Çelebi el-Kâtib.