İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 331 Hüküm no: 316 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Mustafa’nın vefat eden Velizâde Ahmed Efendi’de kalan alacağı hususunda vârisi ile anlaştığı Mahmiye-i İstanbul’da Pîrinççi Sinan mahallesi sâkinlerinden İbrahim Beşe b. Mustafa nâm kimesne meclis-i şer‘-i şerîfde Kirmasti mahallesinde sâkin iken bundan akdem vefât eden Velizâde Ahmed Efendi’nin sulbiye kebîre kızı ve terekesine vâzı‘atü’l-yed olan fahrü’l-muhadderât Emetullah nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Süleyman Çelebi b. Osman ve Mehmed Çelebi b. Abdullah nâm kimesneler şehâdetleri ile şer‘an sâbit olan Osman Efendi b. Mehmed nâm kimesne mahzarında ikrâr ve takrîr-i kelâm edip müvekkile-i mezbûrenin babası müteveffâ-yı mezbûr Ahmed Efendi’nin hayâtında emri ile ba‘zı levâzımına kendi malımdan sarf eylediğim bin beş yüz parayı ve emrim ile mezbûr Ahmed Efendi ulûfemden yirmi beş guruş ve bundan akdem vefât eden Rıfâîzâde demekle şehîr Mehmed Efendi zimmetinde cihet-i deyn-i şer‘îden hakkım olan iki yüz guruşumu ahz u kabz ettiğimden sonra zimmetinde müctemi‘ olan cem‘an iki yüz altmış iki buçuk guruşumu kable’l-edâ mezbûr Ahmed Efendi vefât etmekle terekesine vâzı‘atü’l-yed olan müvekkile-i mezbûr Emetullah Hâtun’dan bundan akdem taleb eylediğimde, beynimizde münâza‘ât-ı kesîre vukū‘undan sonra muslihûn tavassut edip beynimizde altmış guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr altmış guruşu mezbûr Emetullah yedinden tamâmen ahz u kabz ettiğimden sonra husûs-ı mezkûra müte‘allika da‘vâdan müvekkile-i mezbûre Emetullah Hâtun’un merhûm-ı mezbûr Ahmed Efendi’nin sâir veresesi olan sulbiye sagīre kızı Afîfe ve Sâliha ve zevcesi Şemsinaz bt. Abdullah ve Şahbaz bt. Abdullah’ın zimmetlerini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Atâullâh Efendi, es-Seyyid Yusuf Çelebi b. es-Seyyid Mustafa, Ahmed Çelebi b. Ali, Osman b. Ömer, İbrahim Çelebi b. Ahmed, Ahmed Çelebi b. Esad, Mehmed Çelebi b. İlyas ve gayruhüm.