İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 332 Hüküm no: 317 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdülcelil’in vefat eden Mehmed Çelebi b. Osman’da olan alacağını vârislerinden tahsil ettiği ve rehini iade ettiği Mahmiye-i İstanbul’da Topkapısı dâhilinde Arpa Emîni mahallesinde sâkin Mustafa Bey b. Abdülcelîl nâm kimesne meclis-i şer‘-i şerîfde mahalle-i mezbûrede sâkin iken bundan akdem vefât eden Mehmed Çelebi b. Osman’ın zevce-i metrûkeleri olup evlâd-ı sıgārı Mehmed ve es-Seyyid Mustafa ve Şerife Fâtıma’nın vasiyy-i muhtârları olan Emine bt. Mahmud ve Şerife Sâliha bt. es-Seyyid Ali Efendi nâm hâtun mahzarlarında ikrâr ve takrîr-i kelâm edip müteveffâ-yı mezbûr Mehmed Çelebi hayâtında bin seksen beş senesi Rebî‘ulâhiri’nin yirmi üçüncü günü yedinde mülkü olup mahalle-i mezbûrede vâki‘ bir tarafdan [82a] mezbûre Emine mülkü ve iki tarafdan Gevher Hâtun mülkü olan bahçe ve bir tarafdan tarîk-i âm ile mahdûd bir bâb tahtânî oda ve bir sagīre sofa ve bir kenîf ve bir bahçeyi müştemil menzilini, bi tarîki’l-istiğlâl yüz esedî guruş semen-i makbûza bana bey‘ ve teslîm ben dahi ba‘de’l-iştirâ ve’t-teslîm menzil-i mezbûr ba‘de’t-tahliyyeti’ş-şer‘iyye ve’t-takābuzi’l-mer‘î yevm-i mezbûrdan otuz altı ay tamâmına değin ayda onar semene Mehmed Çelebi’ye îcâr ve teslîm ol dahi ba‘de’l-istîcâr ve’t-tesellüm bin seksen altı senesi Rebî‘u gurresine değin on dört ay zabt edip semen-i mezbûru ve ücret-i merkūmeden müctemi‘ olan yüz kırk semeni kable’l-edâ vefât ettiğinden sonra terekesine vâzı‘atü’l-yed olan mezbûretân Emine ve Şerife Sâliha meblağayn-i mezbûreyn yüz guruşu ve yüz kırk semeni müteveffâ-yı mezbûrun terekesinden bana edâ ve teslîm ben dahi ba‘de’l-kabz menzil-i mezbûru mezbûretân Emine ve Şerife Sâliha’ya teslîm anlar dahi kabz ve tesellüm eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Saferi’l-hayr li sene seb‘a ve semânîn ve elf. Şuhûdü’l-hâl: Es-Seyyid Ali Efendi el-İmâm, Hüseyin Halîfe b. ( ) el-Müezzin, Mustafa b. Musa, İvaz Bey b. Bektaş, Ahmed b. Mustafa, Mehmed Halîfe el-Müezzin, el-Hâc Abdülbâkī b. Derviş, Mustafa Bey b. Abdullah, Mustafa Halîfe el-Müezzin, el-Hâc Mehmed Efendi el-İmâm ve gayruhüm mine’l-hâzırîn.