İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 344 Hüküm no: 331 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Şaban’ın Kürd oğlu Ali Beşe b. Abdullah’ta alacağı olduğu Mahmiye-i İstanbul’da Camcı çeşmesi kurbunda Debbâğzâde mahallesi sükkânından bâ‘is-i hâze’l-kitâb İbrahim Çelebi b. Şaban nâm kimesne meclis-i şer‘-i şerîfde Kürd oğlu Ali Beşe b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ali Beşe zimmetinde cihet-i karz-ı şer‘îden yirmi kıt‘a esedî guruş ile yirmi akçe hakkım olmağla suâl olunup meblağ-ı mezbûr yirmi kıt‘a esedî guruş ile yirmi akçeyi mezbûr Ali Beşe’den alıverilmek matlûbumdur dedikde gıbbe’s-suâl mezbûr Ali cevâbında fi’l-hakīka kaziyye minvâl-i muharrer üzre olup müdde‘î-i mezbûr cihet-i merkūmeden zimmetinde yirmi kıt‘a esedî guruş ile yirmi akçe deyni olduğunu bi’t-tav‘i’s-sâf ikrâr ve i‘tirâf etmeğin mûcebince meblağ-ı mezbûr yirmi kıt‘a esedî guruş ile yirmi akçeyi müdde‘î-i mezbûr İbrahim Çelebi’ye edâ ve teslîme merkūm Ali Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Abdullah Çelebi b. Ahmed, Receb Beşe b. Abdullah, Mustafa Çelebi b. el-Hâc Ahmed, Osman Beşe b. Ömer, Ali Beşe b. Şaban, Kara Mustafa b. Abdullah, Ali Beşe b. İbrahim ve gayruhüm mine’l-hâzırîn.