İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 343 Hüküm no: 330 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Receb’in eşi Seyyid Ali Çelebi’den muhâla‘a yoluyla boşandığı Mahmiye-i İstanbul’da Beyceğiz mahallesi sâkinelerinden olup zâtı ma‘rifet-i şer‘iyye ile ârifân Mustafa b. Ahmed ve Ömer Bey b. Osman nâm kimesneler ta‘rîfleri ile mu‘arrefe olan Sâliha bt. Receb nâm Hâtun meclis-i şer‘-i şerîfde zevc-i dâhili bâ‘is-i hâze’l-kitâb es-Seyyid Ali Çelebi b. Mehmed nâm kimesne mahzarında ikrâr ve takrîr-i kelâm edip zevcem mezbûr es-Seyyid Ali Çelebi zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr es-Seyyid Ali Çelebi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın [zimmetini] ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Veli Beşe b. ( ) el-Muhzır, Mehmed b. Veli, Osman b. ( ) el-Muhzır ve gayruhüm mine’l-hâzırîn.