İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 368 Hüküm no: 361 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hatice bt. el-Hâc Ali’nin vârislerinin, kendilerine intikal eden köle Dilaver bt. Abdülvehhâb’ı azat ettikleri Mahmiye-i İstanbul’da Hoca Üveys mahallesi sâkinelerinden iken bundan akdem vefât eden Hatice bt. el-Hâc Ali nâm hâtunun verâseti sadrî kebîr oğulları Mehmed Ağa ve Ali Ağa b. Muslihiddin nâm kimesnelere münhasıra olduğu şer‘an sâbit ve mütehakkik oldukdan sonra mezbûr Mehmed Ağa tarafından husûs-ı âti’l-beyâna vekîli olduğu mahalle-i mezbûre sükkânından es-Seyyid Mehmed Çelebi b. Ömer ve es-Seyyid Ahmed Çelebi b. Mustafa nâm kimesneler şehâdetleri ile şer‘an sâbit olan Mehmed Çelebi b. Ramazan nâm kimesne vekâleten mezbûr Ali Ağa asâleten meclis-i şer‘-i şerîfde ikrâr ve takrîr-i kelâm edip müteveffât-ı mezbûrenin terekesinden olup rıkkıyyetini mu‘terife işbu orta boylu açık kaşlı ala gözlü Rûsiyyetü’l-asl sâhibetü hâze’l-kitâb Dilâver bt. Abdülvahhab nâm câriyeyi hasbeten lillâhi’l-meliki’l-Hallâk ve taleben li merzâti rabbi’r-Rezzâk tahrîr ve i‘tâk ve zümre-i harâir-i asliyyâta idrâc ve ilhâk eyledik ba‘de’l-yevm mevsûfe-i mezbûre Dilaver sâir harâir-i asliyyât gibi hürre olup üzerinde hakk-ı velâdan gayrı hak ve alâka bâkī kalmadı dediklerinde mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Efendi b. Himmet el-İmâm, Musa Efendi b. Himmet, Mustafa b. Receb, Ali b. Ahmed, Mehmed b. Kenan, Mahmud Çelebi b. Hasan, es-Seyyid Mustafa b. Bayram, el-Hâc Yusuf b. Abdullah, Receb Çelebi b. Murad ve gayruhüm.