İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 367 Hüküm no: 360 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Çelebi b. Mahmud’un Yusuf b. Abdullah’ta alacağı olduğu Mahmiye-i İstanbul’da Ali Paşa-yı Atîk mahallesinde sâkin bâ‘is-i hâze’l-kitâb İsmail Çelebi b. Mahmud nâm kimesne meclis-i şer‘-i hatîr-i lâzımü’t-tevkīrde Yusuf b. Abdullah nâm kimesne mahzarında üzerine da‘vâ ve takrîr-i kelâm edip bundan akdem beynimizde ma‘lûm üzüm semeninden mezbûr Yusuf zimmetinde üç bin yüz akçe hakkım olup hâlâ taleb ettiğimde bana edâdan imtinâ‘ eder suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Yusuf cevâbında fi’l-vâki‘ kaziyye minvâl-i muharrer üzre olup zimmetinde meblağ-ı mezbûr üç bin yüz akçe mezbûr İsmail Çelebi’ye deyni olduğunu bi’t-tav‘i’s-sâf ikrâr ve i‘tirâf etmeğin mûcebince meblağ-ı mezbûr üç bin yüz akçeyi mezbûr İsmail Çelebi’ye edâ ve teslîme mezbûr Yusuf’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Halil Beşe b. Osman, Veli Beşe b. Halil, Durmuş b. Pîr Veli, Hanife Beşe el-Bakkal, Mehmed Çelebi b. ( ) ve gayruhüm.