İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 412 Hüküm no: 423 Orijinal metin no: [111a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihân bt. Yusuf’un bakımındayken vefat eden oğlunun nafakasından alacağı olduğu iddiasıyla eski kocası İsmail Çelebi aleyhine açtığı davada sulh olduğu Mahmiye-i İstanbul’da Hatice Sultan mahallesinden sâkine İsmihân bt. Yusuf nâm hâtun meclis-i şer‘-i şerîfde zevc-i mutallıkı işbu bâ‘isü’l-kitâb İsmail Çelebi b. Zülfikār nâm kimesne mahzarında ikrâr-ı tâm ve takrîr-i kelâm edip mezbûr İsmail Çelebi’nin benden mütevellid sulbî oğlu Mustafa bi hakki’l-hidâne benim hucr ve terbiyyemde iken bi emrillâhi te‘âlâ fevt oldukda, techîz ve tekfîni için dört esedî guruş istidâne ve harc ve sarf ettiğimden gayrı sagīr-i mezbûrun hayâtında nafaka ve kisvesi için taraf-ı şer‘-i şerîfden farz ve takdîr olunan yevmî dörder akçeden iki senede iki bin [111b] sekiz yüz akçe müctemi‘ olmağla hâlâ meblağ-ı sâlifü’l-beyân dört esedî guruş ile meblağ-ı mezbûr iki bin sekiz yüz akçeyi mezbûr İsmail Çelebi’den taleb ve da‘vâ eylediğimde, beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî muslihûn tavassut edip mezbûr İsmail Çelebi ile beni meblağayn-i mezbûreyn da‘vâsından on beş esedî guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş esedî guruşu mezbûr İsmail Çelebi yedinden bi’t-tamâm ahz u kabz edip husûs-ı mezbûra müte‘allika âmme-i da‘vâdan ve muhâsamâtdan mezbûr İsmail Çelebi’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ali Çavuş b. Mehmed Çavuş, Mehmed Çelebi b. ( ) el-Hallâk, Sâlih b. Balaban, Mehmed b. ( ) el-Münâdî, Seyfullah Çelebi, Mustafa Çelebi b. el-Hâc Ahmed, İbrahim Çelebi b. Ahmed.