İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 411 Hüküm no: 422 Orijinal metin no: [111a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hasan’ın Hacı Mehmed b. Mahmud’dan muhâla‘a yoluyla boşandığı Mahmiye-i İstanbul’da Akşemseddin mahallesinde sâkine Fâtıma bt. Hasan nâm hâtunun vâlidesi tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mehmed Ağa b. İbrahim ve Veli Efendi b. Mehmed nâm kimesneler şehâdetleri ile şer‘an sâbit olan Havvâ bt. Mehmed nâm hâtun meclis-i şer‘-i şerîf-i enverde müvekkile-i mezbûrenin zevci bâ‘is-i hâze’l-kitâb el-Hâc Mehmed b. Mahmud nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hâtun zevci merkūm el-Hâc Mehmed zimmetinde mütekarrir ve ma‘kūdun-aleyh mehr-i müecceli olan üç bin akçenin bin akçesini mezbûr el-Hâc Mehmed yedinden ahz u kabz eylediğinden sonra bâkī iki bin akçesi ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre zevci merkūm el-Hâc Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete ve gayra müte‘allika âmme-i de‘âvî ve mütâlebâtdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hüseyin Çelebi b. Yunus, Mehmed Ağa b. İbrahim, Veli Efendi b. Mehmed, Mustafa Çelebi b. Süleyman, Ahmed Çelebi b. ( ), berber Mehmed Çelebi, İbrahim b. Ahmed.