İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 413 Hüküm no: 425 Orijinal metin no: [111b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maksude bt. Bayram’ın Rus asıllı câriyesi Şivekar bt. Abdullah’ı azat ettiği Husûs-ı âti’l-beyânın mahallinde tahrîr iltimâs olunmağın savb-ı şer‘den Mevlânâ İbrahim Efendi b. Şaban irsâl olunup ol dahi Maksude bt. Bayram nâm hâtunun mahmiye-i İstanbul’da Sancakdâr Hayreddin mahallesinde sâkine olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde zâtı ma‘rifet-i şer‘iyye ile ârifân mahalle-i mezbûre sükkânından Ramazan Çavuş b. Mehmed ve Sinan Beşe b. Abdullah nâm kimesneler ta‘rîfleriyle mu‘arrefe olan mezbûre Maksude meclis-i ma‘kūd-ı mezbûrda ikrâr ve takrîr-i kelâm edip bana rıkkıyyetini mu‘terife olan [112a] orta boylu ala gözlü sarı açık kaşlı Rûsiyyetü’l-asl Şivekâr bt. Abdullah nâm câriyemi hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk târih-i kitâbdan iki sene mukaddem malımdan tahrîr ve i‘tâk ve zümre-i harâir-i asliyyâta idrâc ve ilhâk eyledim hâlâ mevsûfe-i mezbûre Şivekâr iki seneden beri sâir harâir-i asliyyât gibi hürre olup üzerinde velâ-i şer‘îden gayrı hakkım kalmamışdır dedikde vâki‘ hâli Mevlânâ-yı mezbûr mahallinde tahrîr ve ma‘an irsâl olan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Efendi b. Mehmed el-İmâm, Eyyûb Halîfe b. Süleyman müezzin, el-Hâc Bektaş Ağa b. Abdullah, el-Hâc Mehmed b. Ali, el-Hâc Hüseyin b. Abdullah, Abdurrahman Çelebi b. Mustafa, Mustafa Çelebi b. Seydî ve gayruhüm.