İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 414 Hüküm no: 426 Orijinal metin no: [112a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosis v. Kirakos’un kendisini boşayan karısı İsteyani bt. Asvador aleyhine açtığı alacak davasında sulh olduğu Mahmiye-i istanbul’da Langa kurbunda ( ) mahallesi sâkinlerinden Mosis v. Kirakos nâm zimmî meclis-i şer‘-i şerîfde bâ‘isetü hâze’s-sifr İsteyani bt. Asvadur nâm nasrâniye tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sâkinlerinden Melkis v. Bağlı ve Asvadur v. Nacil nâm zimmîler şehâdetleri ile şer‘an sâbit olan Eremya v. Saruhan nâm zimmî muvâcehesinde ikrâr ve takrîr-i kelâm edip bundan akdem müvekkile-i mezbûre İsteyani nefsini şuhûd mahzarında bana inkâh ve tezvîc, ben dahi tezevvüc ve kabûl ettiğimden sonra mezbûre İsteyani’ye bir hâtem ve bir sîm ayna ve üç zirâ‘ sandal verip ve üç bin akçe dahi ba‘zı mesârifine emri ile harc ve sarf edip ol dahi bana bir sîm kadeh verdiğinden sonra kable’d-duhûl mezbûre İsteyani beni tatlîk etmekle ben zikr olan kadehi müvekkile-i mezbûra teslîm ol dahi ahz u kabz zikr olunan hâtem ve aynayı ve sandalı bana def‘ ve teslîm ben dahi ahz u kabz ettiğimden sonra meblağ-ı mezbûr üç bin akçeyi dahi müvekkile-i mezbûreden da‘vâ ve taleb ettiğimde ol dahi emrini inkâr etmekle beynimizde nizâ‘-i küllî vukū‘undan muslihûn tavassut edip müvekkile-i mezbûre [ile] İsteyani beynimizde bin beş yüz akçe üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin beş yüz akçeyi müvekkile-i mezbûre yedinden tamâmen ahz u kabz ettiğimden sonra husûs-ı mezbûra müte‘allika âmme-i de‘âvîden müvekkile-i mezbûrenin zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. [112b] Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Veli Bey b. Mahmud, Ebûbekir b. Hüseyin, Osman b. Ömer, Mehmed b. Mehmed, Kazar v. Mardiros, Donik v. Sarok, Ağya v. Hakır ve gayruhüm.