İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 415 Hüküm no: 427 Orijinal metin no: [112b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Ömer Efendi b. Ebûbekir’in evini Hacı Ahmed b. Abdurrahman’a sattığı Mahmiye-i İstanbul’da Ali Paşa-yı Atîk mahallesinde sâkin fahrü’l-kuzât Ömer Efendi b. Ebûbekir Efendi meclis-i şer‘-i şerîf-i âlîde sadr-nişîn-i Rumeli muhzırlarından bâ‘is-i hâze’l-kitâb Karakız demekle şehîr el-Hâc Ahmed b. Abdurrahman mahzarında ikrâr ve takrîr-i kelâm edip silk-i mülkümde münselik olup mahmiye-i mezbûrede Derviş Ali mahallesinde vâki‘ bir tarafdan Sofu Mehmed Efendi zevcesi Fâtıma Hâtun bt. Ali mülkü ve bir tarafdan ba‘zan Muhzır Receb Çelebi b. Murad mülkü ve ba‘zan Ulu Bey mülkü ve bir tarafdan ba‘zan el-Hâc İsmail ve ba‘zan Abdurrahman Çavuş mülkü ve bir tarafdan tarîk-i âm ile mahdûd, dâhiliyyesi iki bâb fevkānî oda ve bir sofa ve tahtânî iki bâb oda ve bir matbah ve bir kiler ve cüneyne ve kenîfi ve hâriciyyesi bir bâb fevkānî oda altında bir oda ve tahtında ahırı müştemil mülk menzilimi, mezbûr el-Hâc Ahmed’e tarafeynden îcâb ve kabûlü hâvî şurût-ı müfsideden ârî cemî‘ tevâbi‘ ve levâhıkla yedi yüz elli esedî guruşa bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve kabûl ve tesellüm eylediğinden sonra semeni olan meblağ-ı mezbûr yedi yüz elli esedî guruşu mezbûr el-Hâc Ahmed yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm el-Hâc Ahmed’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Sadakçı Ahmed Çelebi, Hasan b. Şaban, Eyyûbî Ahmed Çelebi, İbrahim Efendi kethüdâ-yı sadr-nişîn-i Rum, Fahrü’l-akrân Hasan Çavuş.