İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 416 Hüküm no: 429 Orijinal metin no: [112b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ziba bt. Abdullah’ın boşandığı kocası Hüseyin Beşe b. Hasan aleyhine açtığı nafaka ve mehir davasında sulh olduğu Mahmiye-i İstanbul’da Topkapısı dâhilinde Bayezid Ağa mahallesi sâkinelerinden olup zâtı ma‘rifet-i şer‘iyye ile ârifân Ahmed Çelebi b. İvaz ve Rıdvan Beşe b. Koca nâm kimesneler ta‘rîfleri [ile] mu‘arrefe olan Ziba bt. Abdullah nâm hâtun meclis-i şer‘-i şerîfde zevc-i mutallıkı bâ‘is-i hâze’l-kitâb Hüseyin Beşe b. Hasan nâm kimesne mahzarında ikrâr ve takrîr-i kelâm edip mezbûr Hüseyin Beşe târih-i kitâbdan üç gün mukaddem beni talâk-ı bâyin ile tatlîk etmeğin zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet ve me’ûnet-i süknâmı bundan akdem mezbûr Hasan Beşe’den da‘vâ ve taleb ettiğimde ol dahi bana edâdan imtinâ‘ etmekle beynimizde münâza‘ât-ı kesîre vukū‘undan sonra muslihûn tavassut edip mezbûr Hüseyin Beşe [113a] ile beynimizde bin akçeye sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi mezbûr Hüseyin Beşe yedinden tamâmen ahz u kabz ettiğimden sonra husûs-ı mezbûra ve târih-i kitâba gelinceye beynimizde cârî olan cemî‘ ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’l-hısâm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hasan Çelebi b. Mahmud, Mustafa bin Şaban, Mehmed b. Mustafa, İbrahim Çelebi b. Ahmed ve gayruhüm mine’l-hâzırîn.