İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 416 Hüküm no: 430 Orijinal metin no: [113a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ciğerci Pemo v. Dimo’nun değirmen hissesini Petso v. Penko ve Pemo v. Kiko’ya sattığı Vilâyet-i Rumeli’nde Opar kazâsına tâbi‘ Porzayiç nâm karye ahâlîsinden olup mahmiye-i İstanbul’da Küçükkaraman’da ciğerci tâ’ifesinden Pemo v. Dimo nâm zimmî meclis-i şer‘de, bâ‘is-i [hâze’s-]s-sifr Petso v. Penko ve Pemo v. Kiko nâm zimmîler muvâcehelerinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk değirmenimin nısfını, mezbûrân Petso ve Pamo’ya tarafeynden îcâb ve kabûlü hâvî şurût-ı müfsideden ârî iki bin sekiz yüz akçeye bey‘-i kat‘î ile bey‘ ve temlîk anlar dahi ale’l-iştirâki’s-seviy iştirâ ve temellük ettiklerinden sonra semeni olan meblağ-ı mezbûr iki bin sekiz yüz akçeyi mezbûrân Petso ve Pemo yedlerinden tamâmen ahz u kabz edip zikr olunan değirmenin nısfı mahallinde zabt ve tasarrufa mezbûrân Petso ve Pemo’yu taslît eyledim ba‘de’l-yevm mârrü’z-zikr değirmenin nısf-ı şâyi‘i mezbûrân Petso ve Pemo’nun mülk-i müşterâsıdır, keyfe mâ yeşâ’ ve yahtârân mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ali b. Hüseyin, Mehmed b. Abdullah, Ahmed b. Şâhin, İbrahim Çelebi b. Ahmed, Muharrem b. Mahmud, Ebûbekir b. Hüseyin, Ali Beşe b. Şaban, Mustafa b. Ali, Pemo v. Tanaş, Kiko v. Aleksi, Kiko v. Petso, Pemo v. Kiko ve gayruhüm.