İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 427 Hüküm no: 444 Orijinal metin no: [118a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karcıbaşı Mehmed Ağa b. Ebûbekir’in kar dağıtımı için şerbetçilerle anlaştığı Mahmiye-i İstanbul’da hâlâ karcıbaşı olan Mehmed Ağa b. Ebûbekir nâm kimesne kendi tarafından asâleten ve karcı tâ’ifesinin ihtiyârlarınından Mehmed Beşe b. el-Hâc Rıdvan ve İbrahim Beşe b. İsâ nâm kimesneler taraflarından husûs-ı âti’l-beyâna sâbitü’l-vekâle vekîl olmağla vekâleten meclis-i şer‘de, mahmiye-i mezbûrede şerbetçiler kethüdâsı olan Mustafa b. Mehmed ve yiğitbaşıları Osman b. Ahmed ve ihtiyârlarından el-Hâc Musa b. Mehmed ve el-Hâc Bâli b. Yakub ve Ahmed b. Şaban ve el-Hâc Mustafa b. Halil ve Halil Beşe b. Mehmed ve Mehmed b. Ahmed ve Ali b. Mustafa ve el-Hâc Mahmud b. Mahmud ve İsâ Beşe b. Mehmed ve Abdülbekir ve Mehmed nâm kimesneler mahzarlarında asâleten ve vekâleten takrîr-i kelâm ve ta‘bîr ani’l-merâm edip medîne-i Hazret-i Ebâ Eyyûb-i Ensârî hâricinde İdris Köşkü nâm mevzi‘ kurbunda vâki‘ karlıklarda ve vilâyet-i Anadolu’da Yalakābad kazâsına tâbi‘ Kocaderesi nâm karye kurbunda vâki‘ karlıklarda hâlâ mevcûd olup benim ve müvekkillerimin mülkü olan kardan mu‘tâd-ı kadîm üzre her gün eyyâm-ı sayfda mahmiye-i mezbûreye birkaç yük kar getirip, mezbûrûn şerbetçilerden her birine dükkânı önünde kifâyet mikdârı kar teslîm edip anlar dahi alıp her bir yük kar için benim ile müvekkillerim râyicü’l-vakt akçeden doksan sekizer akçe verip biz dahi alıp koltukçulara kar vermeyip ve mezbûrûn şerbetçiler dahi ber vech-i muharrer getirdiğimiz karı alıp her yükü için ber vech-i muharrer ta‘yîn olunan meblağı verip bana ve müvekkillerime cefâ etmemek üzre mezbûrân şerbetçiler ile ben ve müvekkillerim kavl ü ittifâk ve ahd [ü] mîsâk eyledik mezbûrûn şerbetçilere suâl olunup takrîrleri tahrîr olunmak matlûbumdur dedikde gıbbe’s-suâl mezbûrûn şerbetçilerden her biri kaziyye minvâl-i muharrer üzre olduğunu tâyi‘an ikrâr ve i‘tirâf etmeğin mâ vaka‘a bi’t-taleb ketb olundu. Fî selhi şehri Rebî‘ilevvel li sene seb‘a ve semânîn ve elf. Şuhûdü’l-hâl: Mahmud Çelebi b. İsmail, Hüseyin Çelebi b. Mustafa, Osman Çelebi b. Ömer, İbrahim Efendi b. Şaban, Abdurrahman Efendi b. Mustafa, Ebûbekir b. Hüseyin ve gayruhüm mine’l-hâzırîn.