İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 428 Hüküm no: 445 Orijinal metin no: [118b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. Bahşâyiş’in alacaklı olduğu Süleyman Beşe b. Hasan’la sulhu Mahmiye-i İstanbul’da Debbâğ Yunus mahallesinde sâkin Hüseyin Beşe b. Bahşâyiş nâm kimesne meclis-i şer‘-i şerîf-ı lâzımü’t-teşrîfde, Süleyman Beşe b. Hasan nâm kimesne mahzarında üzerine da‘vâ ve takrîr-i da‘vâ edip mezbûr Süleyman Beşe’ye târih-i kitâbdan bir sene mukaddem dokuz esedî guruşumu ikrâz ve teslîm ol dahi yedimden iktirâz ve kabz etmişdi hâlâ suâl olunup meblağ-ı mezbûru bana edâ ve teslîme mezbûr Süleyman Beşe’ye tenbîh olunmak matlûbumdur dedikde gıbbe’s-suâl mezbûr Süleyman Beşe cevâbında târih-i kitâbdan bir sene mukaddem müdde‘î-i mezbûr benden meblağ-ı mezbûr dokuz esedî guruşu da‘vâ ve taleb ettiğinde beynimizde nizâ‘-ı küllî vukū‘undan sonra muslihûn tavassut edip mezbûr Hüseyin Beşe ile beş esedî guruş üzerine beynimizde inşâ-i akd-i sulh eylediklerinde mezbûr Hüseyin Beşe dahi sulh-ı mezbûru kabûl ve bedel-i sulh olan meblağ-ı mezbûr beş esedî guruşu yedimden tamâmen ahz u kabz edip husûs-ı mezbûra müte‘allika cemî‘ da‘vâdan zimmetimi ibrâ ve iskāt etmiş idi deyû def‘le mukābele edicek gıbbe’l-istintâk ve’l-inkâr mezbûr Süleyman Beşe’den def‘-i mezbûrunu [mübeyyine] beyyine taleb olundukda udûl-ı müslimînden el-Hâc Mehmed b. Ahmed ve Yahya Çelebi b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan bir sene mukaddem müdde‘î-i mezbûr Hüseyin Beşe merkūm Süleyman Beşe’den meblağ-ı mezbûr dokuz esedî guruşu da‘vâ ve taleb eylediğinde, ol dahi edâdan imtinâ‘ etmekle beynlerinde nizâ‘-ı küllî vukū‘undan sonra muslihûn tavassut edip mezbûr Süleyman Beşe ile beynlerinde beş esedî guruş üzerine inşâ-i akd-i sulh eylediklerinde müdde‘î-i mezbûr dahi bizim huzûrumuzda sulh-ı mezbûru kabûl ve bedel-i sulh olan meblağ-ı mezbûr beş esedî guruşu merkūm Süleyman Beşe yedinden tamâmen ahz u kabz etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr Hüseyin Beşe ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman b. Ömer, Ali Beşe b. Şaban, Ebûbekir b. Hüseyin, Muharrem b. Ömer.