İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 440 Hüküm no: 460 Orijinal metin no: [123b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyneb bt. Abdullah’ın Hüseyin Beşe b. Hasan’dan muhâla‘a yoluyla boşandığı Mahmiye-i İstanbul’da hısnı ebvâbından Topkapısı dâhilinde Bayezid Ağa mahallesi sâkinelerinden olup zâtı ma‘rifet-i şer‘iyye ile ârifân Ahmed Çelebi b. İvaz ve Rıdvan Beşe b. Koca nâm kimesneler ta‘rîfleri ile mu‘arrefe olan Zeyneb bt. Abdullah nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Hüseyin Beşe b. Hasan nâm kimesne mahzarında ikrâr ve takrîr-i kelâm edip mezbûr Hüseyin Beşe zimmetinde mütekarrir ve ma‘kūdun-aleyh olan iki bin akçe mehr-i müeccelimin bin akçesini mezbûr Hüseyin Beşe yedinden ahz u kabz edip bâkī bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr Hüseyin Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledikden sonra târih-i kitâba gelince beynimizde cârî olan cemî‘ ahz u i‘tâ ve mu‘âmelât-ı şettâya müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-hâmis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ahmed Çelebi b. İvaz, Rıdvan Beşe b. Koca, Hasan Beşe ta‘rîfli?, Mehmed b. Abdullah, Mehmed Beşe b. ( ) bostancı ve gayruhüm mine’l-hâzırîn.