İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 439 Hüküm no: 459 Orijinal metin no: [123b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’in İlyas b. Abdünnebi’den muhâla‘a yoluyla boşandığı Mahmiye-i İstanbul’da Sarmaşık mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından Ahmed b. Musa ve Hüseyin b. Mehmed nâm kimesneler ta‘rîfleri ile mu‘arrefe olan Fâtıma bt. Hüseyin nâm hâtun meclis-i şer‘-i şerîf-i lâzımü’t-teşrîfde, zevc-i dâhili bâ‘is-i hâze’l-kitâb İlyas b. Abdünnebi nâm kimesne mahzarında ikrâr ve takrîr-i kelâm edip zevcim mezbûr İlyas zimmetinde mütekarrir ve ma‘kūdun-aleyh olan altı yüz akçe mehr-i müeccelim ve nafaka-i iddet-i mu‘ayyene-i ma‘lûmem ve mezbûr İlyas’ın firâşından hâsıl hamlim zuhûr edip hayyen tevellüd ederse yedi seneye değin kendi malımdan infâk ve iksâ etmek üzerlerine ve me’ûnet-i süknâm dahi kendi üzerime olmak üzre merkūm İlyas ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Rebî‘ilâhir li sene seb‘a ve semânîn ve elf. Şuhûdü’l-hâl: Musa b. Ali, İbrahim b. Muslu, Osman b. Veli, Mehmed b. Hasan, Derviş b. Ömer ve gayruhüm.