İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 441 Hüküm no: 462 Orijinal metin no: [124a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın alacaklı olduğu damadı Mustafa Çelebi b. Hacı Receb ile sulh olduğu Mahmiye-i İstanbul’da Çukur mahallesinde sâkine olup zâtı Mehmed Çelebi b. Ramazan ve Receb Bey b. Mehmed nâm kimesneler ta‘rîfleri [ile] mu‘arrefe olan Timurhan Hân bt. Abdullah nâm hân meclis-i şer‘-i enverde bi’l-fi‘l dâmâdı olan bâ‘is-i hâze’l-vesîka Mustafa Çelebi b. el-Hâc Receb mahzarında ikrâr ve takrîr-i kelâm edip mezbûr Mustafa Çelebi zimmetinde cihet-i karz-ı şer‘îden dört yüz yirmi esedî guruş hakkım olup meblağ-ı mezbûrun altmış esedî guruşunu mukaddemâ yedinden ahz u kabz edip üç yüz altmış guruşu zimmetinde bâkī kalmağla meblağ-ı bâkī-i mezbûr üç yüz altmış esedî guruş mezbûr Mustafa Çelebi yedinden da‘vâ ve taleb eylediğimde, ol dahi meblağ-ı bâkī-i mezbûrun bundan akdem bir def‘a yüz üç esedî guruşunu ve bir def‘a kırk esedî guruşunu sana edâ ve teslîm edip ancak iki yüz on yedi esedî guruş zimmetimde bâkī kalmışdı deyû ba‘zı müdde‘âmda def‘le mukābele etmekle beynimizde nizâ‘-i küllî vukū‘undan sonra muslihûn tavassut edip mezbûr Mustafa Çelebi ile beynimizde iki yüz elli esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz elli esedî guruşu merkūm Mustafa Çelebi yedinden tamâmen ahz u kabz eylediğimden sonra husûs-ı mezkûra ve târih-i kitâba gelince beynimizde cereyân eden ahz u i‘tâ ve hukūk-ı ma‘lûme ve mechûleye müte‘allika âmme-i de‘âvî ve mütâlebâtdan biz mezbûr Mustafa Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûr Mustafa Çelebi dahi bedel-i sulh-ı mezbûra ve kezâlik hukūk-ı ma‘lûme ve mechûleye müte‘allika cemî‘ de‘âvîden benim zimmetimi ibrâ ve iskāt eyledi ba‘de’l-yevm biri birimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Çelebi b. Ramazan, Mehmed Efendi b. Süleyman el-İmâm, Mehmed Efendi b. el-Hâc Halil, el-Hâc Ahmed b. Mehmed Bey Bevvâb-ı sultânî, Abdülkādir Efendi el-Müezzin, el-Hâc Osman b. Abdullah, Osman Beşe b. Abdullah, Mehmed b. Aslan, Murad b. Mehmed, Receb Bey Bevvâb-ı sultânî, el-Mübâşir ve gayruhüm mine’l-hâzırûn.