İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 442 Hüküm no: 463 Orijinal metin no: [124a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Haydar’ın vârislerinden kızları Emetullah ve Fâtıma’nın miras hususunda İshak Çelebi b. Mehmed ile sulh oldukları Mahmiye-i İstanbul’da Dülgerzâde mahallesinde sâkine iken bundan akdem vefât eden Ayşe bt. Haydar nâm hâtunun verâseti, zevc-i metrûkü İshak Çelebi b. Mehmed nâm kimesne ile sulbî kebîr oğlu Sunullah ve sagīr oğlu Mehmed’e ve sulbiye kebîre kızları Emetullah ve Fâtıma ve Hamide nâm hâtunlara münhasıra ve tashîh-i mes’elesi yirmi sekiz sehimden olup sihâm-ı mezbûreden yedi sehimi mezbûr İshak Çelebi’ye ve altışar sehmi dahi mezbûrân Sunullah ve Mehmed’e ve üçer sehimi mezbûrât Emetullah ve Fâtıma ve Hamide’den her birine isâbet ettiği şer‘an zâhir ve mütehakkik oldukdan sonra mezbûretân Emetullah ve Fâtıma taraflarından husûs-ı âti’l-beyâna vekîl olup vekâlet zâtını ma‘rifet-i şer‘iyye ile ârifân Hasan Çelebi b. Mehmed ve İsmail b. Ali nâm kimesneler şehâdetleri ile şer‘an sâbit olan Mustafa Beşe b. Hızır nâm kimesne meclis-i şer‘-i şerîfde müteveffât-ı mezbûrenin terekesini vâzı‘ [124b] ü’l-yed olan bâ‘is-i hâze’l-kitâb mezbûr İshak Çelebi mahzarında bi’l-vekâle ikrâr ve takrîr-i kelâm edip müvekkiletân-ı mezbûretân Emetullah ve Fâtıma’dan her biri müteveffât-ı mezbûrenin terekesinden vech-i muharrer üzre kendilere isâbet eden sehimleri mukābelesinde şerâit-i sıhhat-i sulhü hâvî ve mevâni‘-i müfsideden ârî bi tarîki’t-tehârüci’ş-şer‘î nukūd-ı terekeden hisselerinden eyzan? onar kıt‘a esedî guruşa sulh olup bedel-i sulh olan meblağ-ı mezbûr onar guruşu mezbûr İshak Çelebi yedinden tamâmen ahz u kabz eylediklerinden sonra tereke-i müteveffât-ı mezbûreye müte‘allika âmme-i de‘âvîden mezbûr İshak Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt ettiler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Ağa b. Mustafa, Ali Dede b. Mustafa, Usta Handan b. Abdullah, Ali Beşe b. Abdullah, Mustafa b. Hasan, es-Seyyid Mehmed Çelebi b. Abdurrahman, Hüseyin Çelebi b. Kasım ve gayruhüm mine’l-hâzırîn.