İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 445 Hüküm no: 467 Orijinal metin no: [125b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mahmud b. Mustafa’nın kölesi Hasan b. Abdülvehhâb’ı mükâtebe yoluyla azat ettiği Mahmiye-i İstanbul’da Başçı Hâc mahallesi sâkinlerinden el-Hâc Mahmud b. Mustafa nâm kimesne tarafından husûs-ı âti’z-zikre vekîl olduğu mahalle-i mezbûre sâkinlerinden İbrahim Beşe b. Hüseyin ve İbrahim Çelebi b. Şaban nâm kimesneler şehâdetleriyle şer‘an sâbit olan Süleyman Çelebi b. Abdülbâkī meclis-i şer‘-i şerîfde müvekkil-i mezbûr el-Hâc Mahmud’a rıkkıyyetini i‘tirâf eden orta boylu açık kaşlı ala gözlü Eflakü’l-asl bâ‘is-i hâze’l-kitâb Hasan b. Abdülvahhab mahzarında bi’l-vekâle ikrâr ve takrîr-i kelâm edip müvekkilem mezbûr el-Hâc Mahmud mevsûf-ı mezbûr Hasan târih-i kitâb şehri gurresinde[n] iki sene tamâmına değin kendiye hizmet edip ba‘dehu âzâd olmak üzre mezbûr Hasan’ı kitâbete kat‘ edip mezbûr Hasan dahi kitâb-ı mezbûreyi kabûl eyledi dedikde mevsûf-ı mezbûr Hasan mukırr-ı merkūmu cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. Haydar, Hasan Çelebi b. ( ), Hasan Çelebi b. Ahmed ve gayruhüm.