İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 472 Hüküm no: 499 Orijinal metin no: [135b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Yusuf’un Yenikapı’da kendisini yaralayan Mahmud Beşe b. Mustafa ile sulh oldukları Mahmiye-i İstanbul’da hısnı ebvâbından Mevlevihâne Yenikapısı dâhilinde Hasırcı mahallesinde sâkin Mustafa b. Yusuf nâm kimesne meclis-i şer‘-i şerîfde Mahmud Beşe b. Mustafa nâm kimesne mahzarında ikrâr ve takrîr-i kelâm edip târih-i kitâbdan üç gün mukaddem mezbûr Mahmud Beşe zikr olunan Yenikapı’da ba‘de’l-asr bir siyah saplı hançer ile bir def‘a kabzası ile ve bir def‘a tiğı ile sağ küreğim üzerine darb ve cerh etmekle bundan akdem mûceb-i şer‘îsini mezbûr Mahmud Beşe’den da‘vâ ve taleb eylediğimde, beynimizde ba‘de’n-nizâ‘ muslihûn tavassut edip mezbûr Mahmud Beşe ile beynimizde on beş esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr on beş esedî guruşu yedinden tamâmen ahz u kabz ettiğimden sonra harc-ı mezbûra ve mâ tehaddese minhu müte‘allika da‘vâdan mezbûr Mahmud Beşe’nin zimmetini ibrâ ve iskāt edip ve mezbûr Mahmud Beşe dahi bedel-i sulhe müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Atâullâh Efendi b. Ali, Halil Efendi b. Şaban, Şaban Beşe b. Mustafa el-Mübâşir, Şâhin b. Abdullah, Murad Beşe Karamürselli, Mehmed Beşe b. ( ), Ali Beşe b. ( ), Abdullah Çelebi b. Ahmed, Haydar b. Abdullah, Hasan Çelebi Bölükbaşı ve gayruhüm.