İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 471 Hüküm no: 498 Orijinal metin no: [135a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çavuş b. Veli’nin evini el-Hâc Ebûbekir b. Ömer’e sattığı Fi’l-asl Mahmiye-i İstanbul’da Muhtesib İskender mahallesi sâkinlerinden olup hâlâ vilâyet-i Rumeli’nde Rahova kasabasında mutavattın olan Ahmed Çavuş b. Veli nâm kimesne tarafından husûs-ı âti’l-beyâna vekîl olduğu li ebeveyn karındaşı Hasan Çelebi ve kasaba ahâlîsinden Mehmed b. Hazret ve mahalle-i mezbûre ahâlîsinden Abdülkādir Çelebi b. Mehmed nâm kimesneler şehâdetleriyle şer‘an sâbit olan Mehmed Bey b. Sefer nâm kimesne meclis-i şer‘-i şerîfde bâ‘is-i hâze’l-kitâb el-Hâc Ebûbekir b. Ömer nâm kimesne mahzarında ikrâr ve takrîr-i kelâm edip müvekkil-i mezbûr Ahmed Çavuş’un yedinden mülkü olup mahalle-i mezbûrede vâki‘ iki tarafdan merkūm el-Hâc Ebûbekir mülkü ve iki tarafdan tarîk-i [135b] âm ile mahdûd fevkānî iki bâb oda ve bir sofa ve bir tahtânî oda ve iki dut ağacını müştemil menzilini, bi cümleti’t-tevâbi‘ ve’l-levâhık mezbûr el-Hâc Ebûbekir tarafından îcâb ve kabûlü hâvî bey‘-i kat‘î ile iki yüz esed[î] guruşa bey‘ ve teslîm ol dahi vech-i muharrer üzre iştirâ ve tesellüm ettiğinden sonra semeni olan meblağ-ı mezbûrun yüz guruşunu müvekkilim mezbûr Ahmed Çavuş zimmetinde cihet-i deyn-i şer‘îden hakkı olan yüz guruşa takās ve yüz guruşunu nakden bana edâ ve teslîm edip ben dahi mukāssa ve kabûl ve kabz ve tesellüm eyledim ba‘de’l-yevm menzil-i mahdûd-ı merkūm mezbûr el-Hâc Ebûbekir’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Mehmed b. Hasan, İbrahim Çelebi b. Abdullah, Yusuf Çelebi b. Abdullah, es-Seyyid Mustafa Efendi [b.] Mehmed el-İmâm, Süleyman Çelebi el-Müezzin.