İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 473 Hüküm no: 501 Orijinal metin no: [136a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Çelebi b. Mehmed’in evini Mustafa Ağa b. Hasan’a sattığı Mahmiye-i İstanbul’da Debbâğzâde mahallesi sâkinlerinden Abdullah Çelebi b. Mehmed nâm kimesne meclis-i şer‘-i şerîfde Dergâh-ı âlî yeniçerilerinin altmışıncı ağa bölüğüne mahsûs odanın hâlâ çorbacısı olan fahrü’l-akrân sâhib-i hâze’l-kitâb Mustafa Ağa b. Hasan nâm kimesne tarafından husûs-ı âti’l-beyâna vekîl olduğu el-Hâc İsmail b. Hüseyin ve el-Hâc Mustafa b. Ali nâm kimesneler şehâdetleri ile şer‘an sâbit olan el-Hâc Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahmiye-i mezbûrede Hoca Üveys mahallesinde vâki‘ bir tarafdan Yorgi dükkânı ve bir tarafdan el-Hâc Subaşı mülkü ve bir tarafdan Kireççizâde mülkü ve bir tarafdan tarîk-i âm ile mahdûd muhavvata-i dâhiliyyesi fevkānî iki bâb oda ve bir tahtapûş ve hamam ve câmekân ve bir matbah ve bir kiler ve bi’r-i mâ ve kenîf ve cüneyneyi muhtevî ve hâriciyyesi fevkānî üç bâb oda ve bir sofa ve bir köşk ve bir kiler ve kenîfi ve süflîsi üç bâb oda ve matbah ve bir ahır ve bir samanlık ve bir su kuyusu ve cüneyneyi müştemil menzilimi, îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin dokuz yüz elli esedî guruşa bey‘ ve teslîm ol dahi iştirâ ve tesellüm ve kabz ettiğinden sonra semeni olan meblağ-ı mezbûr bin dokuz yüz elli guruşu müvekkil-i merkūm yedinden tamâmen ahz u kabz eyledim ba‘de’l-yevm menzil-i mahdûd-ı mezkûr müvekkil-i merkūm Mustafa Ağa’nın mülk-i müşterâsıdır, keyfe mâ yeşâ’ mutasarrıf olsun dedikde vekîl-i mezbûr el-Hâc İsmail mukırr-ı mezbûru cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Efendi b. Ali el-İmâm, Veli Beşe b. Nasûh, es-Seyyid Yusuf Beşe, Mustafa b. Receb el-Attâr, Ömer Çavuş b. İbrahim, Mustafa Çelebi b. İsmail ve gayruhüm.