İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 473 Hüküm no: 502 Orijinal metin no: [136a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın İsmail b. Mehmed’den boşandığı Mahmiye-i İstanbul’da Mustafa Paşa mahalle[si] sâkinelerinden olup zâtı ma‘rifet-i şer‘iyye ile ârifân olan mahalle-i mezbûre sükkânından el-Hâc İsâ b. Ali ve Ali b. Mehmed nâm kimesneler ta‘rîfleri ile mu‘arrefe olan Hatice bt. Abdullah nâm hâtun meclis-i şer‘-i şerîfde zevc-i dâhili İsmail [136b] b. Mehmed nâm kimesne mahzarında ikrâr ve takrîr-i kelâm edip zevcim mezbûr İsmail zimmetinde mütekarrir ve ma‘kūdun-aleyh olan elli bin yüz akçe mehr-i müeccelim ve nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre, mezbûr İsmail ile muhâla‘a-i sahîha-i şer‘iyye ile muhâla‘a edip ol dahi ber vech-i muharrer muhâla‘a-i mezbûreyi kabûl ettikden sonra hukūk-ı zevciyyete müte‘allika âmme-i da‘vâ[da]n her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Nasreddin b. el-Hâc Mansur, el-Hâc Abdi b. el-Hâc Ali, Ali b. el-Hâc Mehmed, Ali b. Şaban, Ebûbekir b. Hüseyin ve gayruhüm mine’l-hâzırîn.