İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 477 Hüküm no: 507 Orijinal metin no: [137b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. İbrahim’in terekesinden menzil hissesinin Hatice bt. İzzet Bey’in olduğu Mahmiye-i İstanbul’da Emir Buhârî mahallesinde sâkin iken bundan akdem vefât eden Mehmed Efendi b. İbrahim nâm kimesnenin li üm kız karındaşı ve hasren vârisesi olan Şerife Ayşe bt. Ali nâm hâtunun sadrî oğlu ve tarafından husûs-ı âti’l-beyâna vekîl olduğu nehc-i şer‘î ile sâbit olan es-Seyyid Lütfullah b. es-Seyyid Mustafa nâm kimesne meclis-i şer‘-i şerîfde zikri âtî menzile vâzı‘atü’l-yed olduğu mütehakkik olan bâ‘is-i hâze’l-kitâb Hatice bt. İzzet Bey nâm hâtun mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi’nin terekesinden olup mahalle-i mezbûrda vâki‘ bir tarafdan Solak Mehmed Bey mülkü ve bir tarafdan Şaban Ağa sâkin olduğu vakıf menzil ve bir tarafdan ba‘zan Ahmed Efendi mülkü ve ba‘zan tarîk-i hâs ve taraf-ı râbi‘i tarîk-i âm ile mahdûd menzilin dâhiliyyesi olup iki bâb fevkānî ve iki bâb tahtânî odalar ve ma[h]zen ve kenîf ve bi’r-i mâyı ve hadîkayı müştemil menziline mezbûre Hatice bi gayri hakkın vaz‘-ı yed etmekle hâlâ suâl olunup menzil-i mezbûrdan kasr-ı yed edip bana teslîme tenbîh olunmak bi’l-vekâle matlûbumdur dedikde gıbbe’s-suâl mezbûre Hatice cevâbında müteveffâ-yı mezbûr Mehmed hayâtında ve bin yetmiş iki senesi Cemâziyelevveli’nin evâilinde dâhiliyye-i mezbûreyi zevcesi olan Ayşe bt. Evren Bey nâm hâtuna elli dört bin akçeye bey‘ ve teslîm ol dahi ve tesellüm ve kabûl ettiğinden sonra semeni olan meblağ-ı mezbûr elli dört bin akçe mezbûr Mehmed Efendi zimmetinde [138a] mütekarrir mehr-i müecceli olan yirmi dört bin akçe ve yine cihet-i karz-ı şer‘îden hakkı olan otuz bin akçe min haysi’l-mecmû‘ mezbûr Mehmed Efendi zimmetinde hakkı olan elli dört bin akçeyi takās edip mezbûr Mehmed Efendi dahi mukāssa ve kabûl edip hattâ mezbûre Ayşe’nin yedine hüccet dahi verip dâhiliyye-i mezbûre merkūme Ayşe’nin mülk-i müşterâsı oldukdan sonra mezbûre Ayşe vefât edip verâseti, mezbûr Mehmed Efendi’ye ve li ebeveyn karındaşı olmağla bana münhasıra olmağın menzil-i mezbûrun nısf-ı şâyi‘i irsen bana intikāl etmekle vaz‘-ı yed eder deyû mazmûnu min külli’l-vücûh takrîr-i meşrûhunu nâtık ve târih-i mezbûr ile müverraha ve Burgos kazâsından sâbit olan Hasan Efendi imzâsıyla mümzât ve hatmi ile mahtûme hüccet-i şer‘iyye ibrâz edip vekîl-i mezbûr es-Seyyid Lütfullah muvâcehesinde feth ve kırâ’at ve istintâk olundukda ol dahi mazmûn-ı hüccet-i mezkûreyi bi tav‘ihî ikrâr ve i‘tirâf etmeğin mûcebince mârrü’z-zikr dâhiliyyenin nısf-ı şâyi‘i mezbûre Hatice mülk-i mevrûsu olduğuna ba‘de’l-hükm, mezbûr Lütfullah dâhiliyye-i mezbûrenin nısf-ı şâyi‘aya mu‘âraza[dan] men‘ olunup mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilâhir li sene seb‘a ve semânîn ve elf. Şuhûdü’l-hâl: es-Seyyid Abdullah b. Hasan, Ahmed b. Ebûbekir el-Mübâşir, İsmail b. Ahmed, el-Hâc Mustafa b. Tevekkül ve gayruhüm.