İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 486 Hüküm no: 519 Orijinal metin no: [142a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Yusuf Beşe’nin evinin vârisleri tarafından Muharrem Çelebi b. Ahmed Efendi’ye satıldığı Mahmiye-i İstanbul’da Mimar Sinan mahallesi sâkinlerinden iken bundan akdem vefât eden Emetullah bt. Yusuf Beşe’nin verâseti, vâlidesi Kâtibe bt. Abdullah nâm hâtun ile li üm kız karındaşı Hatice bt. Osman ve li ebeveyn ammi oğulları Ali Beşe ve Mahmud ve Tanrıverdi nâm kimesnelere münhasıra olup ba‘dehu mezbûre Hatice dahi vefât edip verâseti vâlidesi mezbûre Kâtibe’ye ve babası mezbûr Osman’a ve ecri mezbûrûn Ali Beşe ve Mahmud ve Tanrıverdi’den her birine isâbet eylediği şer‘an sâbit oldukdan sonra mezbûr Ali Beşe kendi tarafından asâleten ve mezbûre Kâtibe ile mezbûrân Mahmud ve Tanrıverdi taraflarından husûs-ı âti’l-beyâna vekîl olduğu mezbûre Kâtibe’nin zâtını ma‘rifet-i şer‘iyye ile ârifân Hasan Beşe b. Murad ve Mehmed Çelebi b. Ahmed nâm kimesneler şehâdetleri ile şer‘an vekâleti sâbite olmağla vekâleten meclis-i şer‘-i şerîfde mefharü erbâbü’t-tahrîr ve’l-kalem sâhib-i hâze’l-kitâb Muharrem Çelebi b. Ahmed Efendi mahzarında ikrâr ve takrîr-i kelâm edip arsasının Kara Emin nâm sâhibü’l-hayrın vakfına ayda on iki akçe icâre-i müeccelesi olup ebniyesi müteveffât-ı mezbûre Emetullah’ın terekesinden olup mahalle-i mezbûrede vâki‘ bir tarafdan Süleyman Çelebi menzili ve bir tarafdan es-Seyyid Ali Efendi menzili ve bir tarafdan Mevlânâzâde Mustafa Çelebi menzili ve bir tarafdan tarîk-i âm ile mahdûd iki bâb oda ve bir matbah ve bi’r-i mâyı müştemil menzilin ebniyesinden benim ve mezbûrûn Kâtibe ve Mahmud ve Tanrıverdi’nin bi tarîki’l-münâsahati’ş-şer‘iyye on sekiz sehimden hisse-i şer‘iyyemiz olan on altı sehimi, bi cümleti’t-tevâbi‘ ve’l-levâhık merkūm Muharrem Çelebi’ye tarafeynden îcâb ve kabûlü hâvî bey‘-i kat‘î ile on altı bin akçeye bey‘ ve teslîm arsasını dahi izn-i mütevellî ile meccânen ferâğ ve tefvîz ol dahi iştirâ ve tesellüm ve tefevvüz ve kabûl ettiğinden sonra semen-i mezbûr [142b] on altı bin akçeyi bana edâ ve teslîm ben dahi tamâmen ahz u kabz eyledim ba‘de’l-yevm menzil-i mezbûrun ebniyesinin on sekiz sehimden on altı sehmi mezbûr Muharrem Çelebi’nin mülk-i müşterâsıdır ve arsası hakk-ı müfevvezidir dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’l-hâdî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ahmed Çelebi b. Memi el-Müezzin, Mehmed Çelebi b. Ahmed, Süleyman Çelebi b. Abdi el-küttâbî, Yusuf Beşe b. Abdullah, Musa Beşe b. Hasan.