İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 486 Hüküm no: 518 Orijinal metin no: [141b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tersane emini Yusuf Efendi’nin bağını el-Hâc Mustafa Ağa b. Abdullah’a sattığı Bi’l-fi‘l Tersâne-i âmire emîni olan umdetü’l-emâcid ve’l-ekârim Yusuf Efendi tarafından husûs-ı âti’l-beyâna vekîl olduğu Mehmed Çelebi b. Ahmed ve el-Hâc Ali Çelebi b. Mustafa nâm kimesneler şehâdetleri ile şer‘an sâbit olan Ahmed Efendi [b.] Receb nâm kimesne meclis-i şer‘-i şerîfde bâ‘is-i hâze’l-kitâb el-Hâc Mustafa Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Yusuf Efendi silk-i mülkünde münselik olup mahmiye-i Edirne’ye tâbi‘ Azadlı nâm karyede vâki‘ bir tarafdan Âşıkoğlu Mustafa nâm kimesne bağı ve bir tarafdan Sado v. Niko nâm zimmî bağı ve bir tarafdan Gogo v. Yani nâm zimmî bağı ve bir tarafdan dere ile mahdûd dört dönüm mülk bağını, bi cümleti’t-tevâbi‘ ve’l-levâhık mezbûr el-Hâc Mustafa Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i [142a] şer‘î ile üç bin akçeye bey‘ ol dahi minvâl-i muharrer üzre iştirâ ve kabûl eyledikden sonra semeni olan meblağ-ı mezbûr üç bin [akçe]yi mezbûr Mustafa Ağa yedinden bi’t-tamâm ve’l-kemâl ahz u kabz edip mârrü’z-zikr bağı mahallinde kabz ve tasarrufa mezbûr Mustafa Ağa’yı taslît eyledi ba‘de’l-yevm zikr olunan bağ mezbûr Mustafa Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ömer Çelebi [b.] Cafer, Ali Efendi b. Süleyman, Ahmed Ağa b. Yusuf, Eyyûb Dede b. İbrahim Çelebi, Ahmed Çelebi el-münâdî? ve gayruhüm mine’l-hâzırîn.