İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 488 Hüküm no: 521 Orijinal metin no: [142b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Muhyiddin mahallesinden Havvâ bt. Abdullah’ın bütün eşyasını ve alacağını ölümü halinde kocası Sâlih Çelebi b. Halil’e vasiyet ettiği Mahmiye-i İstanbul’da el-Hâc Muhyiddin mahallesi sâkinelerinden olup zâtı mahalle-i mezbûre sükkânından Osman b. Nasûh ve Ali Çelebi b. Osman nâm kimesneler ta‘rîfleri ile mu‘arrefe olan Havvâ bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Sâlih Çelebi b. Halil nâm kimesne mahzarında ikrâr-ı tâm ve ta‘bîr ani’l-merâm edip ben bi emrillâhi te‘âlâ dâr-ı fenâdan dâr-ı bekāya intikāl ve i[r]tihâl eylediğimde yedimde mülküm hakkım olan eşyâ-i memlûkemden iki döşek ve iki kilim ve üç yorgan ve üç minder ve altı yastık ve iki tencere ve dört sahan ve bir baklava tepsisi ve bir tava ve bir leğen ve bir ibrik ve bir keyl kutusu? ve bir hamam tası ve iki Şam alacası ve bir kaftan ve bir ön sîm kuşak ve çift incili küpe ve bir takye ve bir peçe ve zimmetinde mütekarrir ve ma‘kūdun-aleyh olan iki bin akçe mehr-i müeccelimden bâkī [143a] kalan iki bin akçe hakkım ve sâir ism-i mâl ıtlâk olunan eşyâmın cümlesi zevcim mezbûr Sâlih Çelebi’nin olsun deyû vasiyyet eyledim, ol dahi kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa b. Ali, İbrahim Çelebi b. Ahmed, Osman Beşe b. Ömer, Ebûbekir b. Hüseyin, Mehmed b. Mehmed, Mahmud b. İsmail, Mustafa Çelebi b. Ahmed ve gayruhüm.