İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 488 Hüküm no: 522 Orijinal metin no: [143a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hanım ve kocası Mustafa Ağa’nın evlerini Şehid Mehmed Paşa evkafına bey‘ bi’l-istiğlâl yoluyla sattıkları Mahmiye-i İstanbul’da ( ) mahallesinde sâkin olup merhûm Şehîd Mehmed Paşa’nın evkāfına meşrûtiyyet üzre mütevellî olan Ali Bey b. Ahmed’in umûr-ı tevliyyetini ikāmete kāimmakāmı olan Abdülbâkī Ağa b. Mustafa nâm kimesne meclis-i şer‘-i şerîfde mahmiye-i merkūmede Molla Gürânî mahallesinde sâkine umdetü’l-muhadderât Ayşe Hanım bt. Kasım Ağa nâm hâtunun zevci ve tarafından husûs-ı âti’l-beyâna vekîli olduğu nehc-i şer‘î üzre sâbit olan bâ‘is-i hâze’l-kitâb Silivrilizâde demekle ma‘rûf Mustafa Ağa b. Mehmed mahzarında ikrâr ve takrîr-i kelâm edip mezbûrân Mustafa Ağa ve Ayşe Hanım ale’l-iştirâk yedlerinde mülkü olup mahalle-i mezbûrede vâki‘ bir tarafdan tarîk-i âm ve bir tarafdan Mehmed Efendi veresesi mülkleri ve bir tarafdan Hatice Hâtun vakfı ve bir tarafdan merhûm Ebûbekir Ağa veresesi mülkleri ile mahdûd hâricen ve dâhilen fevkānî ve tahtânî büyût-ı adîde ve hamam ve bahçe ve ahır ve su kuyusu ve bir kârgir mahzeni müştemil menzillerini, bin seksen beş senesi Recebi’nin yedinci günü bi tarîki’l-istiğlâl bana bin beş yüz esedî guruşa bey‘ ve teslîm ben dahi ba‘de’l-iştirâ ve’t-tesellüm semen-i mezkûr bin beş yüz guruşu mâl-ı vakf-ı mezbûrdan mezbûrân Mustafa Ağa ve Ayşe Hanım’a teslîm anlar dahi ahz u kabz eylediklerinden sonra menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î hîn-i akidden bir sene tamâmına değin iki yüz yirmi beş esedî guruşa mezbûrâna îcâr ve teslîm anlar dahi ber vech-i muharrer istîcâr ve tesellüm ve menzil-i mezbûra ber vech-i muharrer mutasarrıf olduklarından sonra mezbûr Mustafa Ağa asl-ı mâl-ı vakf-ı mezbûr olan meblağ-ı mezbûr bin beş yüz esedî guruşun bin esedî guruşu ile menzil-i mezkûrun ücretinden târih-i kitâb senesi Muharremi’nin onuncu gününe gelince on sekiz ayda müctemi‘ olan üç yüz on iki buçuk esedî guruşu min haysi’l-mecmû‘ bin üç yüz on iki buçuk esedî guruşa asâleten ve vekâleten bana edâ ve teslîm ben dahi yedinden ahz u kabz edip beş yüz esedî guruşu zimmetlerinde bâkī kalmış idi hâlâ meblağ-ı bâkī-i mezbûr beş yüz esedî guruş ile menzil-i mezkûr ücretinden zimmetlerinde bâkī kalan on sekiz esedî guruşu ve bir zolotayı dahi mezbûr Mustafa Ağa yedinden tamâmen ahz u kabz eylediğimden sonra akd-i mezbûru fesh ve fekk-i rehin edip yine menzil-i mezbûru [143b] mezbûrân Mustafa Ağa ve Ayşe Hanım’a teslîm anlar dahi tesellüm ve kabz eylediler ba‘de’l-yevm mâl-ı vakf-ı mezbûr olan bin beş yüz esedî guruşdan ve menzil-i mezkûr ücretinden mezbûrân Mustafa Ağa ve Ayşe Hanım zimmetlerinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ahmed Ağa b. Hasan, Ahmed Efendi b. ( ), el-Hâc Ramazan b. Ramaza[n], es-Seyyid Ahmed Efendi b. es-Seyyid Hüseyin, es-Seyyid Mehmed b. Pîr Mehmed.