İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 506 Hüküm no: 541 Orijinal metin no: [150b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Nasûh’a hamile iken boşandığı kocası Mehmed b. Osman’ın nafaka vermesi gerektiği Mahmiye-i İstanbul’da Draman mahallesi sâkinelerinden Ayşe bt. Nasûh nâm hâtun meclis-i şer‘-i şerîfde mutallıkı Mehmed b. Osman nâm kimesne mahzarında takrîr-i da‘vâ ve tasaddî-i müdde‘â edip târih-i kitâbdan on gün mukaddem mezbûr Mehmed beni tatlîk etmekle zimmetinde mütekarrir ve ma‘kūdun-aleyh olan mehr-i müeccelim olan iki yüz akçe ve nafaka-i iddet-i ma‘lûmem ve me’ûnet-i [151a] süknâm için bi’t-terâzi ta‘yîn olunan üç yüz akçeyi bana def‘ ve teslîm ben dahi yedinden ahz u kabzetmiş idim lâkin mezbûr Mehmed’in firâşından hâlâ hamlim [zuhûr] etmekle vaz‘-ı haml edinceye değin nafakam için taraf-ı şer‘den kadri ma‘rûf akçe takdîr olunmak matlûbumdur dedikde fi’l-vâki‘ kaziyye minvâl-i meşrûh üzre olup mezbûre Ayşe’nin ber vech-i muharrer hamli zâhir olduğu lede’ş-şer‘i’l-mutahhar müte‘ayyin ve mütehakkik olmağın hâkim-i muvakki‘-i sadr-ı kitâb tûbâ-leh ve hüsnü me’âb hazretleri târih-i kitâbdan mezbûre Ayşe’nin nafakası için vaz‘-ı haml edinceye değin yevmî beşer akçe farz ve takdîr edip meblağ-ı mezbûru nafakasına sarfa ve vakt-i zarûretde istidâneye ve lede’z-zafer mezbûr Mehmed üzerine rücû‘a izin verip mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Mehmed b. Mustafa, Osman b. Ömer, Ebûbekir b. Hüseyin, Hasan Çelebi el-Muhzır, Kara Mustafa el-Muhzır, Şaban Çelebi el-Muhzır ve gayruhüm.