İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 505 Hüküm no: 540 Orijinal metin no: [150b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdülkadir’in Sivâsî Efendi zaviyesi Vakfı’na olan borcunu mütevelli Abdullah Efendi b. Abdürrahim’e ödeyeceği Husûs-ı âti’l-beyânın mahallinde tahrîr iltimâs olunmağın savb-ı şer‘-i şerîfden irsâl olunan Mevlânâ Hüseyin Efendi b. Ahmed fahrü’l-meşâyihi’l-izâm zahrü’l-ulemâ’i’l-kirâm Sivasîzâde Abdülbâkī Efendi’nin mahmiye-i İstanbul’da Çerağī Hamza mahallesinde sâkin olduğu sa‘âdet-hâ[ne]lerine varıp zeyl-i sahîfede muharrerü’l-esâmî olan müslimîn huzûrunda akd-i meclis-i şer‘ ettikde, mahmiye-i mezbûrede Mehmed Ağa câmi‘-i şerîf kurbunda Beyceğiz mahallesi sâkinelerinden sâhibetü’l-hayrât merhûme Ayşe Hâtun bt. el-merhûm Sefer Efendi’nin terekesinin sülüsünü kabz ve vücûh-ı hayrâta sarfa ve sâir vakfı umûrunu ikāmete taraf-ı şer‘den vasî nasb olunan fahrü’l-akrân Mehmed Ağa b. Abdülkādir nâm kimesne meclis-i ma‘kūd-ı mezbûrda, müteveffât-ı mezbûrenin gallesi merhûm ve mağfûrun-leh Sivasî Efendi zâviyesi fukarâsına meşrûta vakfı olan bin esedî guruşa hâlâ mütevellî olan sâhib-i hâze’l-kitâb Abdullah Efendi b. Abdürrahim nâm kimesne mahzarında bi’t-tav‘i’s-sâf ikrâr ve takrîr-i kelâm edip merhûme-i mezbûre hayâtında zâviye-i mezbûre için vakf eylediği meblağ-ı mezbûru bi’t-tevliyye ba‘zı kimesnelere idâne ettikden sonra kable’l-ahz vefât edip meblağ-ı mezbûr zimem-i nâsda kalmağla ben dahi bi’l-vesâye meblağ-ı mezbûr bin guruşu zimem-i nâsdan cem‘ [ve] tahsîl edip kendi mesârifime sarf ile istihlâk etmekle meblağ-ı mezbûr vakf-ı mezbûra vâcibü’l-edâ ve lâzımü’l-kazâ deynim olmağla meblağ-ı mezbûru târih-i kitâbdan bir ay tamâmına değin mütevellî-i mezbûra edâya ta‘ahhüd eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr, ba‘dehu ma‘an irsâl olunan Osman b. Ömer ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Eş-Şeyh Mehmed Efendi der zâviye-i Mehmed Paşa, Fahrü’l-kuzât Yusuf Efendi b. eş-Şeyh Ebûbekir, İbrahim Bey b. el-Hâc Bayram, Mehmed Efendi b. el-Hâc Bayram, Mehmed b. el-Hâc Bayram, Ali Dede b. ( ), Ali b. Mahmud, Mustafa b. Safa, Ahmed Çelebi el-hâfız, Derviş b. Davud ve gayruhüm.