İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 507 Hüküm no: 543 Orijinal metin no: [151a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Osman’ın boşandığı kocası Aşur b. Osman ile mehir alacağı konusunda sulh olduğu Mahmiye-i İstanbul’da Ebü’l-feth Sultan Mehmed Hân câmi‘-i şerîfi kurbunda vâki‘ Çukurhan demekle ma‘rûf müte’ehhilîn odalarından birinde sâkine Rukiye bt. Osman nâm hâtun meclis-i şer‘-i şerîfde zevc-i mutallıkı Âşur b. Osman nâm kıbtî muvâcehesinde ikrâr ve takrîr-i kelâm edip mukaddemâ mezbûr Âşur beni iki bin akçe mehr-i müeccel ve mehr-i mu‘accel olmak üzre bir kaftan ve bir ferâce ve bir entari ve bir yorgan ve bir döşek ve bir kilim ve bir sahan ve bir tencere vermek üzre inkâh ve tezvîc edip ba‘dehu iki bin akçe mehr-i müeccelim ve nafaka-i iddetim üzerine ve me’ûnet-i süknâm dahi kendi üzerime olmak üzre mezbûr Âşur ile muhâla‘a olup lâkin zikr olunan esbâbı mezbûr Âşur’dan ahz etmemekle, hâlâ [151b] mârrü’z-zikr eşyâyı mezbûr Âşur’dan da‘vâ ve taleb eylediğimde, ol dahi mârrü’z-zikr eşyâyı mehr-i mu‘accel olup bana vermek üzre tezvîc ve inkâh ettiğini inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûr Âşur ile beynimizde iki kıt‘a esedî guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki kıt‘a esedî guruşu mezbûr Âşur yedinden tamâmen alıp kabz edip zikr olunan eşyâ da‘vâsından mezbûr Âşur’un zimmetini ibrâ ve iskāt eyledim dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fî selhi şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Veli b. Mahmud, du‘âcı Mahmud Çelebi b. İsmail, kayıkçı Ali b. Şaban ve gayruhüm.