İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 507 Hüküm no: 544 Orijinal metin no: [151b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hâtun’un, kardeşi Ahmed b. Ali’den miras kalıp kocası İbrahim Beşe b. Abdullah’ta olan alacağını sulh yoluyla aldığı Mahmiye-i İstanbul’da Bezzâz-ı Cedîd mahallesinde sâkin iken bundan akdem vefât eden Ahmed b. Ali nâm sagīrin li ebeveyn kız karındaşı ve hasren vârisesi olan İsmihân Hâtun meclis-i şer‘de, bâ‘is-i hâze’l-kitâb zevci İbrahim Beşe b. Abdullah nâm kimesne mahzarında ikrâr ve takrîr-i kelâm edip müteveffâ-yı mezbûr Ahmed’in hayâtında tesviye-i umûruna kıbel-i şer‘den mansûb vasîsi iken vefât eden Hasan Çelebi b. Süleyman nâm kimesne hâl-i hayâtında, sagīr-i mezbûrun malından dört yüz altmış dokuz guruşu mezbûr İbrahim Beşe’ye idâne ve teslîm ol dahi istidâne ve tesellüm ettikden sonra vasiyy-i mezbûr Hasan Çelebi meblağ-ı mezbûru kable’l-ahz vefât edip meblağ-ı mezbûr dört yüz altmış dokuz guruş zevcim mezbûr İbrahim Beşe’nin zimmetinde bâkī kalıp hâlâ sagīr-i mezbûr dahi vefât etmekle meblağ-ı mezbûr irsen bana intikāl etmeğin ben dahi meblağ-ı mezbûru zevcem mezbûr İbrahim Beşe’den taleb ettiğimde ol dahi merkūm el-Hâc Muhyiddin vakfından yevmî ayda yirmi beş akçe icâre-i müeccele ile taht-ı tasarrufunda olup mahalle-i mezbûrede vâki‘ bir tarafdan Osman Beşe menzili ve bir tarafdan Kilidhanı ve bir tarafdan tarîk-i hâs ile mahdûd ve mümtâz olup tahtânî iki bâb oda ve kenîfi ve havlusunu müştemil menzili bana iki yüz guruş bedel mukābelesinde izn-i mütevellî ile ferâğ ve tefvîz ve bedel-i mezbûru zimmetinde ber vech-i muharrer hakkım olan dört yüz altmış dokuz guruşun iki yüz guruşuna takās edip ben dahi ba‘de’t-tefevvüz ve’l-kabûl mukāssa ve kabûl edip iki yüz altmış dokuz guruşu bâkī kalıp hâlâ meblağ-ı bâkī-i mezbûru merkūm İbrahim Beşe’den taleb ve da‘vâ ettiğimde bana edâdan imtinâ‘ etmekle beynimizde münâza‘ât-ı kesîre ve muhâsamât-ı şedîde vukū‘undan sonra muslihûn tavassut edip zevcim mezbûr İbrahim Beşe bedel-i sulh-ı mezbûr iki yüz guruşu bana def‘aten edâ ve teslîme iktidârı olmamağla taksîte tâlib olmağla ben dahi târih-i kitâbdan yüz yirmi ay tamâmına değin mezbûr İbrahim Beşe her üç ayda bana beş guruş vermek üzre taksît ettiğimde ol dahi ber vech-i muharrer taksîti kabûl ettiğinden sonra ben meblağ-ı mukāssat-ı mezbûr iki yüz guruşdan bâkī altmış dokuz guruşa müte‘allika da‘vâdan zevcim mezbûr İbrahim Beşe’nin zimmetini ibrâ ve iskāt edip ol dahi menzil-i mezbûr [152a] ve bedel-i sulh olan meblağ-ı mukāssat-ı mezbûr iki yüz guruşa müte‘allika da‘vâdan benim zimmetimi ibrâ ve iskāt eyledi dedikde mezbûr İbrahim Beşe mukırra-i mezbûre İsmihân’ı cemî‘ kelimât-ı meşrûhasında vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Beşe b. Yusuf, Mehmed Çelebi b. İsmail, Mübâşir Ali Beşe b. Hüseyin, İbrahim Çelebi b. Mehmed, Pîr Mehmed Çelebi b. Mehmed, mahalle-i mezbûre imâmı Abdullah Efendi.