İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 521 Hüküm no: 561 Orijinal metin no: [157b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe b. Musa’nın eski mütesellim Süleyman Ağa b. Abdullah’taki alacağını alarak zimmetini ibrâ ettiği Fi’l-asl vilâyet-i Anadolu’da Bolu sancağına tâbi‘ Gerede nâm kasaba ahâlîsinden olup mahmiye-i İstanbul’da Uzunçarşı kurbunda Tarakçılar odalarında misâfir olan Veli Beşe b. Musa meclis-i şer‘-i şerîfde sâbıkan Bolu mütesellimi olan fahrü’l-akrân bâ‘is-i hâze’l-kitâb Süleyman Ağa b. Abdullah nâm kimesne tarafından husûs-ı âti’l-beyânı tasdîka vekîl olduğu Mehmed Çelebi b. Mustafa ve Mehmed Çelebi b. Halil Efendi nâm kimesneler şehâdetleri ile şer‘an sâbit olan el-Hâc Hüseyin Çelebi b. Ali mahzarında ikrâr ve takrîr-i kelâm edip müvekkil-i mezbûr Süleyman Ağa bir husûs için kasaba-i mezbûrede bi gayri hakkın yedimden dört yüz guruşumu ahz u kabz etmekle bundan akdem taleb ve da‘vâ eylediğimde ol dahi inkâr etmeğin beynimizde nizâ‘-ı küllî vâki‘ olmuşdu. El-hâletü hâzihî muslihûn tavassut edip müvekkil-i mezbûr Süleyman Ağa bana def‘ ve teslîm ben dahi yedinden ahz u kabz eylediğimden sonra müvekkil-i mezbûr Süleyman Ağa’nın zimmetini ve Çerkeş hancısının zimmetini ibrâ ve iskāt edip müvekkil-i mezbûr Süleyman Ağa dahi bedel-i sulh olan yirmi guruşa müte‘allika da‘vâdan benim zimmetimi ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Müftî Ahmed Efendi b. İshak, el-Hâc Ahmed b. el-Hâc Ömer, el-Hâc Mehmed b. Receb, Ali b. Ahmed, el-Hâc Ahmed b. Mehmed ve gayruhüm.