İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 521 Hüküm no: 560 Orijinal metin no: [157a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Muslu’nun çocuklarına Süleyman Çelebi b. Osman’ın vasî tayin edildiği Mahrûse-i Üsküdar’da Ahmed Çelebi mahallesinde sâkin iken bundan akdem vefât eden Mehmed Çelebi b. Muslu nâm kimesnenin sulbî sagīr oğulları Mustafa ve İbrahim’in tesviye-i umûrlarına vasîleri olan Mustafa Çelebi b. Hasan âhar diyâra gitmek azîmeti olmağın vesâyet-i mezbûreden kasr-ı yed etmekle sagīrân-ı mezbûrânın umûrlarını hıfz ve ahvâllerini zabta taraf-ı şer‘-i enverden bir vasî nasb ve ta‘yîn olunmak ehem ve elzem ve işbu râfi‘ü’l-kitâb Süleyman Çelebi b. Osman nâm kimesne her vechile vesâyete ehil ve müstakīm olmağın mezbûr Süleyman Çelebi taraf-ı şer‘-i şerîfden sagīrân-ı mezbûrânın emvâllerini hıfz ve ahvâllerini zabta vasî nasb ve ta‘yîn olundukda ol dahi vesâyet-i mezbûreyi kabûl ve merâsimini edâya ta‘ahhüd ve iltizâm ettiğinden sonra mezbûr Mustafa Çelebi zamân-ı vesâyetinde sagīrân-ı mezbûrânın mallarından makbûzu olan yüz guruş iki sülüsü ve bir sîm bıçağı bana def‘ ve teslîm ben dahi ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene sitte ve semânîn ve elf. Şuhûdü’l-hâl: Mehmed Çelebi b. Ahmed, Mehmed Çelebi b. Abdullah, Mahmud Çelebi b. Hızır, Ramazan Çelebi b. Abdürrahim, Ahmed Çelebi b. Mehmed ve gayruhüm mine’l-hâzırîn.