İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 522 Hüküm no: 563 Orijinal metin no: [157b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. el-Hâc Hüseyin’in 28. cemaat odası para vakfına olan borcunu ödemesi gerektiği Dergâh-ı âlî yeniçerilerinden yirmi sekizinci cemâ‘ate mahsûs odada mevkūfe nukūda bi’l-fi‘l mütevellî olan Hasan Beşe b. Abdullah nâm kimesne meclis-i şer‘-i şerîfde mahmiye-i İstanbul’da Seydî Bey mahallesi sâkinlerinden Mustafa Bey b. el-Hâc Hüseyin nâm kimesne mahzarında üzerine da‘vâ ve takrîr-i kelâm edip mezbûr Mustafa Bey yetmiş dokuz senesi Şevvâli’nin yirmi yedinci günü yedinde mülkü olup mahalle-i mezbûrede vâki‘ bir tarafdan âhar mülkü ve bir tarafdan Süleyman Ağa mülkü ve bir tarafdan Mehmed Çelebi mülkü ve bir tarafdan tarîk-i âm ile mahdûd fevkānî bir bâb oda ve tahtânî iki bâb oda [158a] ve cüneyne ve kenîfi müştemil menzilini, târih-i mezbûrda vakf-ı mezbûra mütevellî olan Yakub Beşe b. Pîrî nâm kimesneye üç yüz esedî guruşa bi tarîki’l-istiğlâl bey‘ ve teslîm ol dahi iştirâ ve tesellüm ve semen-i mezbûrunu yedinde olan mâl-ı vakf-ı mezbûrdan mezbûr Mustafa Bey’e edâ ve teslîm ol dahi ahz u kabz ettiğinden sonra mezbûr Yakub Beşe’ye menzil-i mezbûru târih-i mezbûrdan bir sene tamâmına değin kırk beş guruşa mezbûr Bey’e îcâr ve teslîm ol dahi istîcâr ve tesellüm ve târih-i kitâba gelince yedi buçuk sene zabt edip menzil-i mezbûrun sene-i ûlâda lâzım gelen ecr-i müsemmâsı için kırk beş guruş ile altı buçuk senede ecr-i misli olan elli sekiz buçuk guruş cem‘an yüz üç buçuk guruşu ve semen-i mezbûrdan iki yüz yirmi sekiz buçuk guruş mezbûr Mustafa Bey zimmetinde bâkī kalmağla meblağ-ı bâkī-i mezbûr iki yüz yirmi sekiz buçuk guruş ile yine mezbûr Mustafa Bey mâl-ı vakf-ı mezbûrdan mütevellî-i mezbûr Yakub Beşe yedinden istidâne ve kabz eylediği yetmiş guruş cem‘an iki yüz doksan sekiz buçuk guruş için beni mezbûr Mustafa Bey üzerine vakf-ı mezbûra benden mukaddem mütevellî olanlar havâle etmekle hâlâ mezbûr Mustafa Bey’e suâl olunup meblağ-ı mezbûr iki yüz doksan sekiz buçuk guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr Mustafa Bey cevâbında kaziyye minvâl-i muharrer üzre olup meblağ-ı mezbûr iki yüz yirmi sekiz buçuk zimmetinde vakf-ı mezbûra deyni olduğunu ikrâr ve i‘tirâf etmeğin mûcebince meblağ-ı mezbûr iki yüz doksan sekiz buçuk guruşu mütevellî-i mezbûr Hasan Beşe’ye edâ ve teslîme mezbûr Mustafa Bey’e tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. İbrahim, Receb Beşe b. Abdullah, Ahmed Beşe b. Abdi, Hasan Beşe b. Abdullah, Mustafa Beşe b. ( ), İbrahim Çelebi b. Mehmed.