İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 525 Hüküm no: 566 Orijinal metin no: [159a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Veli’nin Konorto v. Yasef’ten alacaklı olduğu Mahmiye-i İstanbul’da Küçük Karaman kurbunda hâfız odalarında sâkin bâ‘is-i hâze’l-kitâb Ahmed Beşe b. Veli nâm kimesne meclis-i şer‘-i şerîf-i lâzımü’t-teşrîfde, Konorto v. Yasef nâm yahudi muvâcehesinde üzerine da‘vâ ve takrîr-i kelâm edip mezbûr Konorto zimmetinde yedimden iştirâ ve kabz eylediği beynimizde ma‘lûm bir siyah çuka semeninden on bir guruş üç rub‘ hakkım olmağın suâl olunup alıverilmesi matlûbumdur dedikde gıbbe’s-suâl mezbûr Konorto Yahudi cevâbında fi’l-hakīka müdde‘î-i mezbûr Ahmed Beşe yedinden iştirâ ve kabz eylediğim mârrü’z-zikr çuka semeninden zimmetimde on bir guruş üç rub‘ vâcibü’l-edâ deynimdir deyû bi tav‘ihî ikrâr ve i‘tirâf etmeğin mûcebince müdde‘î-i mezbûr Ahmed Beşe’ye meblağ-ı mezbûr on bir guruş üç rub‘u edâ ve teslîm merkūm Konorto’ya tenbîh birle, mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Ali Beşe b. Şaban, Muharrem b. Mehmed ve gayruhüm.