İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 529 Hüküm no: 572 Orijinal metin no: [160b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mirza v. Samuyil’in reisi olduğu gemi sahibi el-Hâc Mehmed Beşe b. Ali’de taşıdığı mal dolayısıyla olan alacağını aldığı Rüesâ tâ’ifesinden olup mahmiye-i Galata müzâfâtından İstinye nâhiyesine tâbi‘ Yeniköy demekle ma‘rûf karye sükkânından Mirza v. Samuel nâm zimmî meclis-i şer‘-i şerîf-i enver ve mahfil-i dîn-i münîf-i ezherde, yine karye-i mezbûrede sâkin işbu râfi‘ü’l-kitâb el-Hâc Mehmed Beşe b. Ali nâm kimesne mahzarında bi tav‘ihî ikrâr ve takrîr-i kelâm edip ben mezbûr el-Hâc Mehmed Beşe’nin örf-i mellâhînde şayka ta‘bîr olunur yirmi üç zirâ‘ sefîne-i kebîresinde reisi olduğum hasebiyle ma‘lûmü’l-mikdâr sermâyesi ile mahmiye-i İstanbul’dan Köstence nâm iskeleye varıp sermâye-i mezbûre ile buğday iştirâ ve sefîne-i mezbûreye tahmîl ve yine mahmiye-i İstanbul’a gelip mârrü’z-zikr buğdayı bey‘ eylediğimizde sermâyesin ve sâlifü’z-zikr sefînenin mesârif-i müteferrikasını ihrâcdan sonra bâkī yüz otuz dört bin akçe sermâye hâsıla olup meblağ-ı mezbûrdan âdeten ve örfen sefîne reisleri alageldiği üzre iştip ta‘bîr olunur hissemden beş bin sekiz yüz akçe ve ücret-i riyâsetim mukābelesinde altı bin yedi yüz akçe dahi ki min haysi’l-mecmû‘ bana on iki bin beş yüz akçe isâbet edip meblağ-ı mezbûrdan iki bin üç yüz altmış akçesini mezbûr el-Hâc Mehmed Beşe yedinden kabz edip bâkī on bin yüz kırk akçe ücretim kalmağla meblağ-ı mezbûru mezkûr el-Hâc Mehmed Beşe’den taleb eylediğimde ol dahi edâdan imtinâ‘ etmekle beynimizde münâza‘ât-ı kesîre cereyânetmiş idi el-hâletü hâzihî beynimizde muslihûn tavassut edip meblağ-ı mezbûr-ı âhardan bin yüz kırk akçeden beni mezkûr el-Hâc Mehmed Beşe ile on üç esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr on üç esedî guruşu mezkûr el-Hâc Mehmed Beşe yedinden tamâmen ahz u kabz eylediğimden sonra husûs-ı mezbûra müte‘allika âmme-i de‘âvî ve mütâlebât ve eymân ve muhâsamâtdan mezbûr el-Hâc Mehmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eyledim ba‘de’l-yevm bi vechin mine’l-vücûh ve sebebin mine’l-esbâb da‘vâ ve nizâ‘ım yoktur dedikde gıbbe’t-tasdîki’ş-şer‘iyyi’l-mu‘teberi’l-vicâhî, mâ hüve’l-vâki‘ bi’l-ibtigā ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Fahrü’l-akrân Mehmed Beşe el-Mübâşir, Osman Çelebi b. Mustafa el-Muhzır, Osman Beşe b. Ömer, Mehmed Çelebi b. Muharrem, Mehmed Halîfe b. Yakub ve gayruhüm.