İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 530 Hüküm no: 573 Orijinal metin no: [161a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havvâ bt. Ali Çavuş ile Seyyid Ömer Çelebi b. Seyyid Ebûbekir’in muhâla‘a yoluyla boşandıkları Mahmiye-i İstanbul’da Gedik Paşa kurbunda Emin Bey mahallesi sâkinelerinden olup zâtı ma‘rifet-i şer‘iyye ile [ârifân] Davudpaşa mahallesi sâkinlerinden Mehmed Çelebi b. Abdullah ve İbrahim Çelebi b. Mehmed nâm kimesneler ta‘rîfleri ile mu‘arrefe olan Havvâ bt. Ali Çavuş nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb es-Seyyid Ömer Çelebi b. es-Seyyid Ebûbekir nâm kimesne mahzarında ikrâr ve takrîr-i kelâm edip zevcim mezbûr es-Seyyid Ömer Çelebi zimmetinde mütekarrir ve ma‘kūdun-aleyh olan dört bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim merkūm es-Seyyid Ömer Çelebi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i de‘âvâdan her birimiz âharı ibrâ eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Arabzâde Mehmed Efendi b. Ömer, Ali Efendi b. Veli, Osman Ağa b. Mehmed, Hamza Efendi [b.] Ahmed.