İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 535 Hüküm no: 582 Orijinal metin no: [163a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. el-Hâc Abbas ile Süleyman Çelebi b. Abdullah’ın muhâla‘a yoluyla boşandıkları Mahmiye-i İstanbul’da Karabaş mahallesi sâkinelerinden Râbia bt. el-Hâc Abbas nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân el-Hâc Mustafa b. Hasan ve Hasan b. Hüseyin nâm kimesneler şehâdetleri ile şer‘an sâbit olan Hasan Çelebi b. Mahmud nâm kimesne meclis-i şer‘-i şerîf-i enverde mezbûre Râbia’nın zevc-i dâhili bâ‘is-i hâze’l-kitâb Süleyman Çelebi b. Abdullah mahzarında bi’l-vekâle ikrâr ve takrîr-i kelâm edip müvekkilem mezbûre Râbia Hâtun zevci merkūm Süleyman Çelebi zimmetinde mütekarrir ve ma‘kūdun-aleyh olan on bin akçe mehr-i müeccel ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre mezbûr Süleyman Çelebi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i de‘âvî ve mütâlebâtdan her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Kemal Ağa Kethüdâ-yı Hazret-i Efendi, Ali Efendi el-İmâm, Mustafa Ağa b. Abdullah, el-Hâc Mehmed b. Yunus, el-Hâc Ahmed b. Mehmed ve gayruhüm.