İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 536 Hüküm no: 583 Orijinal metin no: [163a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram Çelebi b. Yusuf’un Hüseyin b. Ali’de alacağının olduğu Mahrûse-i Galata müzâfâtından kasaba-i Kasımpaşa’da Servi mahallesi sükkânından bâ‘is-i hâze’l-kitâb Bayram Çelebi b. Yusuf nâm kimesne meclis-i şer‘-i şerîfde Hüseyin b. Ali nâm kimesne mahzarında üzerine da‘vâ ve takrîr-i kelâm edip mezbûr Hüseyin’e [163b] târih-i kitâbdan üç ay mukaddem iki yüz esedî guruşumu ikrâz ve teslîm ol dahi yedimden iktirâz ve tesellüm ve kabz etmekle hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Hüseyin cevâbında fi’l-hakīka müdde‘î-mezbûr yedinden ancak yüz otuz altı esedî guruş istikr[âz] ve kabz eylemiş idim deyû ikrâr, ziyâde yetmiş dört esedî guruşu istikrâz eylediğin inkâr edicek müdde‘î-i mezbûrdan iddi‘âsına mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup ve mezkûr Hüseyin’in istikrâz mu‘terif olduğu meblağ-ı mezbûr yüz otuz altı esedî guruş müdde‘î-i mezbûra edâ ve teslîm merkūm Hüseyin’e tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mumcu Şaban Beşe b. Derviş el-Mübâşir, Hasan Çelebi b. Ahmed, İbrahim Çelebi b. Ahmed, Osman Çelebi b. Ömer, Ebûbekir b. Hüseyin ve gayruhüm.