İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 546 Hüküm no: 594 Orijinal metin no: [168a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mandıracılık yapan Receb Beşe b. Şaban’ın vârisleri tarafından ortağı hamamcı Muslu Çelebi b. Sefer’in zimmetinin ibrâ edildiği Mahmiye-i İstanbul hısnı ebvâbından Edirnekapısı dâhilinde el-Hâc Muhyiddin mahallesi ahâlîsinden iken bundan akdem vefât eden Receb Beşe b. Şaban nâm kimesnenin verâseti, zevce-i metrûkesi Fâtıma bt. Mustafa ile sulbiye kebîre kızı Ayşe nâm hâ[tun]lara münhasıra olduğu şer‘an mütehakkik oldukdan sonra zâtları ma‘rifet-i şer‘iyye ile ârifân el-Hâc Sefer b. Abdullah ve Mehmed Çelebi b. Pîrî nâm kimesneler ta‘rîfleri ile mu‘arrefe olan mezbûretân Fâtıma ve Ayşe meclis-i şer‘-i şerîfde mahalle-i mezbûre sükkânından bâ‘is-i hâze’l-kitâb hamamcı Muslu Çelebi b. Sefer nâm kimesne mahzarında her biri ikrâr ve takrîr-i kelâm edip mûrisimiz müteveffâ-yı mezbûr merkūm Muslu Çelebi ile koyunculuk san‘atında şerîk olmağla müteveffâ-yı mezbûr Receb Beşe koyun mahsûlünden on dört senede kendi hissesine isâbet eden cem‘an otuz bin akçeyi mezbûr Muslu Çelebi’den kable’l-ahz vefât edip meblağ-ı mezbûr zimmetinde kalmağın meblağ-ı mezbûr otuz bin akçeyi verâset-i mahkiyemiz [168b] hasebiyle merkūm Muslu Çelebi’den da‘vâ ve taleb eylediğimizde, ol dahi edâdan imtinâ‘ etmekle beynimizde nizâ‘-ı küllî vukū‘undan sonra muslihûn tavassut edip mezbûr Muslu Çelebi ile yirmi bin beş yüz akçe üzerine beynimizde inşâ-i akd-i sulh eylediklerinde biz dahi sulh-ı mezbûru kabûl ettiğimizden sonra bedel-i sulh olan meblağ-ı mezbûr yirmi bin beş yüz akçenin on iki bin akçesi için müteveffâ-yı mezbûrun dergâh-ı âlî yeniçerilerinin kırkıncı bölüğe mahsûs oda vakfına on iki bin akçe deyni olmağla vakf-ı mezbûr mütevellîsi olan ( ) mezbûr Muslu Çelebi üzerine havâle-i sahîha-i şer‘iyye ile havâle edip anlar dahi her biri havâle-i mezbûreyi kabûl edip ve iki bin beş yüz akçesini dahi mezbûr Muslu Çelebi emrimiz ile kendi malından müteveffâ-yı mezbûrun techîz ve tekfîni için iki bin beş yüz akçe harc ve sarf etmekle masrûfu olan meblağ-ı mezbûr iki bin beş yüz akçeye takās biz dahi mukāssa ve kabûl ettiğimizden sonra bâkī altı bin akçesini dahi mezbûr Muslu Çelebi yedinden tamâmen ahz u kabz edip mârrü’z-zikr koyunun peynirine ve sâir mahsûlüne müte‘allika cemî‘ de‘âvî ve mütâlebâtdan biz mezbûr Muslu Çelebi’nin zimmetini ibrâ ve iskāt edip ve mezbûr Muslu Çelebi dahi bedel-i sulh olan meblağ-ı mezbûr yirmi bin beş yüz akçeye ve husûs-ı mezbûra müte‘allika da‘vâdan bizim zimmetimizi ibrâ ve iskāt eyledi dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Sefer b. Abdullah, Mehmed Çelebi b. Pîrî, Himmet Beşe b. Mehmed, Mehmed b. Mustafa, Halil b. İbrahim, Mustafa Beşe el-Mübâşir, Ahmed b. Mustafa, Halil Beşe b. ( ) ve gayruhüm.