İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 545 Hüküm no: 593 Orijinal metin no: [168a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’in muhâla‘a yoluyla boşandığı kocası Ömer Beşe b. Mustafa’nın zimmetini ibrâ ettiği Mahmiye-i İstanbul’da Debbâğ Yunus mahallesi sâkinelerinden olup zâtı ma‘rifet-i şer‘iyye ile ârifân Abdullah Efendi b. Mehmed ve Mehmed Odabaşı b. İbrahim nâm kimesneler ta‘rîfleri ile mu‘arrefe olan Ayşe bt. İbrahim nâm hâtun meclis-i şer‘-i şerîf-i enverde zevc-i dâhili bâ‘is-i hâze’l-kitâb Ömer Beşe b. Mustafa nâm kimesne mahzarında ikrâr ve takrîr-i kelâm edip zevcim mezbûr Ömer Beşe zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olup ve yedine def‘ ve teslîm eylediğim bir sincab boğazı kürk ve bir zümrüdî sırmalı kadife serpûş ve bir al sırmalı muhattem sarık ve bir kahverengi telli sandal kaftan ve bir al telli sandal entari ve bir kutnî zıbın mezbûr Ömer Beşe’nin mülkü olmak üzre zevcim mezbûr Ömer Beşe ile muhâla‘a-ı sahîha-i şer‘iyye ile muhâla‘a olup ol dahi muhâla‘a-i mezbûreyi kabûl kıldığından sonra hukūk-ı zevciyyete ve gayra müte‘allika âmme-i de‘âvîden ben mezbûr Ömer Beşe’nin zimmetini ibrâ ve iskāt edip ve mezbûr Ömer Beşe dahi zimmetimde hakkı olan üç yüz akçeyi ve vâlidem Necibe bt. Ömer nâm hâtun zimmetinde menzil ücretinden hakkı olan sekiz yüz akçeyi vâlidem mezbûre Necibe yedinden ahz u kabz ettiğinden sonra hukūk-ı zevciyyete ve gayra müte‘allika da‘vâdan benim zimmetimi ve cemî‘ hukūk-ı ma‘lûme ve mechûleye müte‘allika da‘vâdan vâlidem mezbûr Necibe’nin zimmetini ve ceddem Sâliha bt. Mustafa nâm hâtunun zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Odabaşı b. Ali, Hasan b. Veli, İsâ Bey b. Murad, Mehmed Odabaşı b. İbrahim, Ali b. Ali, İbrahim Çelebi b. Mahmud.