İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 551 Hüküm no: 599 Orijinal metin no: [170a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boğdan’a ticaret için giden tüccarın Boğdan halkından esir almaması ve satmaması için yasak hükmü Düstûr-ı mükerrem müşîr-i müfahham nizâmü’l-âlem müdebbir-i umûrü’l-cumhûr bi’l-fikri’s-sâkıb mütemmim-i mehâmmi’l-enâm [bi’r-re’yi’s-]sâ’ib mümehhid-i bünyânü’d-devleti ve’l-ikbâl müşeyyidü’l-erkânü’s-sa‘âdeti ve’l-iclâl el-mahfûf bi sunûfi’l-avâtıfi’l-meliki’l-a‘lâ Leh seferinde asâkir-i İslâmiyye ser-askerim olan vezîrim İbrahim Paşa -edâmallâhu te‘âlâ iclâlehû-tevkī‘-i refî‘-i hümâyûn vâsıl olıcak ma‘lûm ola ki Boğdan kapı kethüdâsı ordu-yı hümâyûna arzuhâl edip Boğdan vilâyetine varan tüccâr tâ’ifesi Boğdan re‘âyâsın kapıp etrâfında vâki‘ kasaba ve kurâya çıkarıp kimin esir ve kimin füruht edip re‘âyâya zulüm ve te‘addî olduğun bildirip ol bâbda hükm-i hümâyûnum recâ etmeğin arzuhâl olunduğu üzre Eflak ve Boğdan re‘âyâsından ba‘zı kimesneler etfâl ve benâtların esir edip füruht etmek istediklerinde her kimin elinde bulunur ise ahz ettirip re‘âyâ ve evlâd-ı re‘â[yâ] oldukları sâbit olursa reddettirip bu makūle te‘addî ettirmemek emrim olmuşdur buyurdum ki hükm-i şerîfim vusûl buldukda bu bâbda sâdır olan fermân-ı celîlü’l-kadrim mûcebince amel edip dahi bu makūle Eflak ve Boğdan re‘âyâsından ba‘zı kimesneler etfâl ve benâtlardan esir edip füruht etmek murâd ettiklerinde her kimin elinde bulunur ise ahz ettirip re‘âyâ ve evlâd-ı re‘âyâ oldukları sâbit olursa red ettirip min ba‘d şer‘-i şerîfe ve emr-i hümâyûnuma muhâlif kimesne bu makūle te‘addî ettirmeyip husûs-ı mezbûr için tekrâr emr-i şerîfim varmalı ettirmeyesiz, şöyle bilesiz alâmet-i şerîfe i‘timâd kılasız. Tahrîren fî evâsıtı Rebî‘ilevvel li sene seb‘a ve semânîn ve elf. Be sahrâ-yı Davudpaşa