İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 551 Hüküm no: 600 Orijinal metin no: [170b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malkoç v. Kirkor’un aldığı borca karşılık evini Hacı Ali Ağa b. Abdünnebi’ye rehin verdiği (bey‘ bi’l-vefâ) Tüccâr tâ’ifesinden olup Langa kurbunda İnebey mahallesi sâkinlerinden Malkoç v. Kirkor v. Bedros nâm zimmî meclis-i şer‘-i şerîfde fahrü’l-akrân bâ‘is-i hâze’l-kitâb el-Hâc Ali Ağa b. Abdünnebi b. Ali nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i mezbûrede vâki‘ bir tarafdan Sanok v. Safer nâm zimmî mülkü ve bir tarafdan Papasoğlu Haçok nâm zimmî mülkü ve bir tarafdan cidâr-ı hısn ve bir tarafdan tarîk-i âm ile mahdûd, tabaka-i ulyâsında iki bâb oda ve bir matbah ve bir sofa ve dehliz ve tahtapûş ve vustâsında dört bâb oda ve dehliz ve kenîf ve süflîsinde bir camcı dükkânı ve iki su kuyusu ve zât-ı eşcâr-ı müsmire bahçeyi müştemil menzilimi, bi cümleti’t-tevâbi‘ ve’l-levâhık merkūm el-Hâc Ali Ağa’ya bi tarîki’l-bey‘ bi’l-vefâ bin esedî guruşa bey‘ ve teslîm ol dahi iştirâ ve tesellüm ettiğinden sonra semen-i mezbûr bin guruşu bin seksen senesi Zilhiccesi’nde yedinden istidâne ve kabz etmekle zimmetimde hakkı olan bin esedî guruşa takās, ben dahi mukāssa ve kabûl ettiğimden sonra bey‘-i mezbûr fi’l-hakīka rehin olmağın meblağ-ı mezbûr bin guruşu târih-i kitâbdan üç yüz gün tamâmında merkūm el-Hâc Ali Ağa’ya edâ edip fekk-i rehine ta‘ahhüd eyledim, eğer târih-i kitâbdan üç yüz gün tamâmında meblağ-ı mezbûrun merkūm el-Hâc Ali Ağa’ya edâ edemeyip zimmetimde kalırsa menzil-i mahdûd-ı mezbûru semen-i misli ile âhara bey‘ ve kabz-ı semen ve semeninden meblağ-ı mezbûr bin guruş ahz ve istîfâya fazlasını bana îsâle ve bey‘ kabz ve îsâl mütevakkıf olduğu umûrun küllîsine tarafımdan merkūm el-Hâc Ali Ağa’yı küllemâ azeltüke fe-ente vekîli mazmûnu üzre azil ve in‘izâlden masûne vekâlet-i devriyye ile vekîl ve nâib-i menâb nasb ve ta‘yîn edip merkūm el-Hâc Ali Ağa dahi vekâlet-i mezbûreyi kabûl eyledi dedikde merkūm el-Hâc Ali Ağa mukırr-ı mezbûru cemî‘ kelimâtında tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Feyzullah Efendi, Abdülkerim Efendi, Mehmed Çavuş b. Abdullah, Mehmed Efendi b. Resûl ve gayruhüm.